തിരുവനന്തപുരം : കേരള അഡ്മിനിസ്‌ട്രേറ്റീവ് സര്‍വീസ് (കെഎഎസ്) പ്രാഥമിക പരീക്ഷ ഫെബ്രുവരി 22നു നടത്താന്‍ പബ്ലിക് സര്‍വീസ് കമ്മീഷന്‍ (പിഎസ്‌സി) തീരുമാനിച്ചു. അപേക്ഷ നല്‍കിയവര്‍ ഡിസംബര്‍ 25നകം കണ്‍ഫര്‍മേഷന്‍ നല്‍കണം.ഒറ്റത്തവണ റജിസ്‌ട്രേഷന്‍ പ്രൊഫൈല്‍ വഴിയാണ് പരീക്ഷ എഴുതുമെന്നുള്ള കണ്‍ഫര്‍മേഷന്‍ നല്‍കേണ്ടത്. മൂന്നു സ്ട്രീമുകളിലേക്കും പൊതുപരീക്ഷയാണ് നടത്തുക.

കണ്‍ഫര്‍മേഷന്‍ നല്‍കാത്തവര്‍ക്ക് പരീക്ഷ എഴുതാന്‍ കഴിയില്ല. ഇവരുടെ അപേക്ഷ പിഎസ്‌സി നിരസിക്കും. പരീക്ഷാ സമയം തീരുമാനിച്ചിട്ടില്ല. കണ്‍ഫര്‍മേഷന്‍ നല്‍കേണ്ട അവസാന തീയതിക്കു ശേഷമേ സമയം പ്രഖ്യാപിക്കൂ. ഒബ്ജക്ടീവ് രീതിയില്‍ നടത്തുന്ന പ്രാഥമിക പരീക്ഷയ്ക്ക് 100 മാര്‍ക്ക് വീതമുള്ള രണ്ടു പേപ്പറുകളാണുള്ളത്. സമയം 90 മിനിറ്റ് വീതം. പ്രാഥമിക പരീക്ഷ വിജയിക്കുന്നവര്‍ക്ക് മെയിന്‍ പരീക്ഷയുണ്ട്.

വിവരണാത്മക രീതിയില്‍ നടക്കുന്ന മെയിന്‍ പരീക്ഷയ്ക്ക് 3 പേപ്പറുകളാണുള്ളത്. ഇതില്‍ വിജയിക്കുന്നവര്‍ക്ക് അഭിമുഖംകൂടി നടത്തി റാങ്ക് ലിസ്റ്റ് പ്രസിദ്ധീകരിക്കും. 50 മാര്‍ക്കിന്റെ അഭിമുഖമാണ് നടത്തുക. മെയിന്‍ പരീക്ഷയുടെയും അഭിമുഖത്തിന്റെയും അടിസ്ഥാനത്തിലാണ് റാങ്ക് ലിസ്റ്റ് തയാറാക്കുക. മൂന്നു സ്ട്രീമുകളിലുമായി 5,76,243 പേര്‍ കെഎഎസിന് അപേക്ഷ നല്‍കിയിട്ടുണ്ട്. ഏറ്റവും കൂടുതല്‍ അപേക്ഷകരുള്ളത് സ്ട്രീം ഒന്നില്‍- 5,47,543 പേര്‍. സ്ട്രീം രണ്ടില്‍ 26,950 പേരും സ്ട്രീം മൂന്നില്‍ 1750 പേരും അപേക്ഷിച്ചിട്ടുണ്ട്.