തിരുവനന്തപുരം: കെഎസ്ആര്‍ടിസിയിലെ സാമ്പത്തിക പ്രതിസന്ധിയെ തുടര്‍ന്ന് ആത്മഹത്യക്ക് ശ്രമിച്ച മുന്‍ ജീവനക്കാരന്‍ മരിച്ചു. തിരുവനന്തപുരം നേമം സ്വദേശി കരുണാകരന്‍ നാടാരാണ് മരിച്ചത്. കഴിഞ്ഞ ദിവസമാണ് കരുണാകരന്‍ ആത്മഹത്യയ്ക്ക് ശ്രമിച്ചത്. നേരത്തെ ബത്തേരിയില്‍ മുന്‍ സൂപ്രണ്ട് നടേശ് ബാബു ആത്മഹത്യ ചെയ്ത വാര്‍ത്ത പുറത്തുവന്നിരുന്നു. സാമ്പത്തിക പ്രതിസന്ധിയാണ് ആത്മഹത്യക്ക് കാരണം എന്ന നടേശ് ബാബുവിന്റെ മരണ കുറിപ്പ് പൊലീസ് കണ്ടെത്തിയിട്ടുണ്ട്.

നേരത്തെ ആറുമാസത്തെ പെന്‍ഷന്‍ ലഭിക്കാത്തതിനെ തുടര്‍ന്ന് 63കാരിയായ തങ്കമ ആത്മഹത്യ ചെയ്തിരുന്നു. ഇത്തവണത്തെ സംസ്ഥാന ബഡ്ജറ്റില്‍ കെഎസ്ആര്‍ടിസിയില്‍കുടിശ്ശിക വന്ന ശമ്പളവും പെന്‍ഷനും മാര്‍ച്ച് മാസത്തില്‍ നല്‍കുമെന്ന് ധനമന്ത്രി തോമസ് ഐസക് പ്രഖ്യാപിച്ചിരുന്നു. ഗുരുതരമായ സാമ്പത്തിക ഞെരുക്കത്തില്‍ പെട്ട് കെഎസ്ആര്‍ടിസി പെന്‍ഷന്‍കാരുടെ ആത്മഹത്യകള്‍ പതിവാകുന്ന സാഹചര്യത്തില്‍ മുഖ്യമന്ത്രി അടിയന്തര യോഗം വിളിച്ചു. രാത്രി എട്ടിന് തിരുവനന്തപുരത്താണ് യോഗം.