ന്യൂഡല്ഹി : കേരളത്തിലോടുന്ന ഒമ്പത് പാസഞ്ചര് ട്രെയിനുകള് എക്സ്പ്രസുകളാക്കി മാറ്റും. റെയില്വേ ടൈംടേബിള് പരിഷ്കരണത്തിന്റെ ഭാഗമായാണ് നടപടി. 200 കിലോമീറ്ററില് കൂടുതല് സഞ്ചരിക്കുന്ന പാസഞ്ചര് ട്രെയിനുകളാണ് എക്സ്പ്രസാക്കാന് നിര്ദേശിച്ചിരിക്കുന്നത്.
നാഗര്കോവില്-കോട്ടയം, കോയമ്പത്തൂര്-മംഗളൂരു, കോട്ടയം-നിലമ്പൂര്, പുനലൂര്-ഗുരുവായൂര്,തൃശൂര്-കണ്ണൂര്, കണ്ണൂര്-കോയമ്പത്തൂര്, മംഗളൂരു-കോഴിക്കോട്, മധുര-പുനലൂര്, പാലക്കാട് ടൗണ്-തിരുച്ചിറപ്പള്ളി പാസഞ്ചര് എന്നിവയാണ് പട്ടികയിലുള്ളത്. ഈ ട്രെയിനുകളുടെ ഹാള്ട്ട് സ്റ്റേഷനുകളിലെ സ്റ്റോപ്പുകളാണ് കേരളത്തില് പിന്വലിക്കുന്ന സ്റ്റോപ്പുകളില് ഏറെയും.
യാത്രക്കാര് കുറവുളള 5 ജോഡി പാസഞ്ചര് ട്രെയിനുകള് റദ്ദാക്കും. എറണാകുളം-കായംകുളം, തൃശൂര്-ഗുരുവായൂര്, എറണാകുളം-കായംകുളം മെമു, പുനലൂര്-കൊല്ലം പാസഞ്ചര്, ആലപ്പുഴ-കായംകുളം എന്നിവയാണ് റദ്ദാക്കുക. പാലക്കാട്-തിരുച്ചെന്തൂര് പാസഞ്ചര് മധുര വരെയാക്കി ചുരുക്കി. പാലക്കാടിനും പൊളളാച്ചിക്കും ഇടയില് പാസഞ്ചറായും പൊളളാച്ചിക്കും മധുരയ്ക്കുമിടയില് എക്സ്പ്രസുമായി സര്വീസ് നടത്തും.
കേരളത്തില് എക്സ്പ്രസ് ട്രെയിനുകളുടെ സ്റ്റോപ്പുകള് കാര്യമായി കുറച്ചിട്ടില്ല. മയ്യനാട്, ഡിവൈന് നഗര് സ്റ്റോപ്പുകളാണ് പ്രധാനമായും ഒഴിവാക്കിയത്. ചെന്നൈ എഗ്മൂര്-കൊല്ലം എക്സ്പ്രസിന്റെ ഇടമണ്,തെന്മല സ്റ്റോപ്പുകളും തിരുനെല്വേലി-പാലക്കാട് പാലരുവിയുടെ ന്യൂ ആര്യന്കാവ്, തെന്മല സ്റ്റോപ്പുകളും പിന്വലിക്കും. ഗുരുവായൂര്- എറണാകുളം പാസഞ്ചര് എറണാകുളം-തൃശൂര്, തൃശൂര്-ഗുരുവായൂര് എന്നിങ്ങനെ രണ്ടാക്കും.
മുംബൈ ഐഐടിയുടെ പഠനത്തിന്റെ അടിസ്ഥാനത്തിലാണ് റെയില്വേ, ടൈംടേബിള് ഉടച്ചു വാര്ക്കുന്നത്. എല്ലാ വര്ഷവും സ്റ്റോപ്പുകളും സര്വീസുകളും പുനപരിശോധിച്ചു നഷ്ടത്തിലായവ ഒഴിവാക്കും. ലിങ്ക് ട്രെയിനുകള് ഒഴിവാക്കുന്നതോടെ 5 ട്രെയിനുകളില് കോച്ചുകളുടെ എണ്ണം കൂടും. എറണാകുളം-കാരയ്ക്കല്, ചെന്നൈ എഗ്മൂര്-ഗുരുവായൂര്, കന്യാകുമാരി- കത്ര ഹിമസാഗര് എക്സ്പ്രസ്, കൊച്ചുവേളി-ഡറാഡൂണ്, ധന്ബാദ്-ആലപ്പുഴ എന്നിവയിലെ കോച്ചുകളുടെ എണ്ണമാണ് കൂടുക. 2 മുതല് 4 വരെ കോച്ചുകള് ആദ്യഘട്ടത്തില് കൂട്ടും.
യാത്രക്കാര് കുറവായതിനാല് മംഗളൂരു-കത്ര നവയുഗ് എക്സ്പ്രസ് റദ്ദാക്കും. എറണാകുളം-ടാറ്റ പുതിയ സര്വീസ് ആരംഭിക്കും. ടൈംടേബിള് പരിഷ്കരണത്തിന്റെ ഭാഗമായി ന്യൂഡല്ഹി-തിരുവനന്തപുരം കേരള എക്സ്പ്രസിന്റെ സമയമാറ്റവും പരിഗണനയിലുണ്ട്. രാത്രിയില് പുറപ്പെടുന്ന രീതിയില് പുനക്രമീകരിക്കാനാണ് ശ്രമം.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates