കൊച്ചി: കോവിഡ് രോ​ഗികളുടെ എണ്ണം പ്രതിദിനം കൂടുന്നതിനിടയിലും നിർദേശങ്ങൾ ലംഘിച്ച് കൊച്ചി ബ്രോഡ്‍വേയിലുള്ള ഹോട്ടലിൽ ഭക്ഷണം വിളമ്പി. ഹോട്ടലിൽ ഭക്ഷണം കഴിക്കുകയായിരുന്ന 20 പേരെ പൊലീസ് കസ്റ്റഡിയിലെടുത്തു. ലോക്ഡൗൺ ചട്ടം ലംഘിച്ച ഹോട്ടലുടമയ്ക്കെതിരെയും നടപടി എടുത്തിട്ടുണ്ട്. ഐജി വിജയ് സാഖറെയുടെ നേതൃത്വത്തിൽ നടന്ന ദ്രുത പരിശോധനയ്ക്കിടെയാണു ആളുകളെ കസ്റ്റഡിയിൽ എടുത്തത്. 

എറണാകുളം മാർക്കറ്റിൽ ഉന്നത ഉദ്യോഗസ്ഥരുടെ നേതൃത്വത്തിലുള്ള സംഘം ഇന്ന് പരിശോധനയ്ക്കെത്തിയിരുന്നു. ലോക്ഡൗൺ ലംഘിച്ച് ആളുകൾ കൂട്ടമായി നഗരത്തിലെത്തുന്നത് ശ്രദ്ധയിപ്പെട്ടതിനെ തുടർന്നായിരുന്നു ഇത്. മാസ്ക് ധരിക്കാതെ നിരത്തിലിറങ്ങിയവർക്ക് താക്കീത് നൽകി. ലോക്ഡൗൺ ചട്ടങ്ങൾ ലംഘിക്കുന്നവർക്കെതിരെ വരും ദിവസങ്ങളിൽ കർശന നടപടി സ്വീകരിക്കുമെന്നും ഐജി പറഞ്ഞു.