കൊല്ലം: കോണ്‍ഗ്രസ് നേതൃനിരയിലേക്ക് കൊടിക്കുന്നില്‍ സുരേഷ് എത്തിയത് സോണിയഗാന്ധിയുടെ ചെവി കടിച്ചിട്ടാണെന്ന് കെപിസിസി പ്രസിഡന്റ് മുല്ലപ്പള്ളി രാമചന്ദ്രന്‍. കൊല്ലം ജില്ലയില്‍ ചേര്‍ന്ന നേതൃയോഗത്തിലായിരുന്നു മുല്ലപ്പള്ളിയുടെ ആക്ഷേപം. കുഴപ്പങ്ങള്‍ തിരുത്തി മുന്നോട്ട് പോകാന്‍ കൊടിക്കുന്നില്‍ തയ്യാറാവണമെന്നും മുല്ലപ്പള്ളി പറഞ്ഞു. 

കൊടിക്കുന്നിലിന് ലഭിച്ച സ്ഥാനലബ്ധിയില്‍ തനിക്ക് അസൂയ ഇല്ലെന്നും എന്നാല്‍ അതിഷ്ടപ്പെടാത്ത ചില കൊല്ലംകാര്‍ ഉണ്ടെന്നും കെപിസിസി പ്രസിഡന്റ് പറഞ്ഞതോടെ കൊടിക്കുന്നില്‍ വിഭാഗം പ്രതിഷേധവുമായി എത്തി. കെപിസിസി പ്രസിഡന്റിന്റെ പ്രസ്താവന പിന്‍വലിക്കണമെന്നും സോണിയ ഗാന്ധിയെ പ്രതിഷേധം അറിയിക്കുമെന്നും കൊടിക്കുന്നില്‍ അനുകൂലികള്‍ വ്യക്തമാക്കി.

ജില്ലയിലെ  കോണ്‍ഗ്രസ് നേതാക്കള്‍ ശൈലി മാറ്റണമെന്നും എടുത്തുചാട്ടം അവസാനിപ്പിക്കണമെന്നും അദ്ദേഹം ആവശ്യപ്പെട്ടു. ഡിസിസി പ്രസിഡന്റ് മിടുക്കിയാണെങ്കിലും എംഎല്‍എ പോലുമില്ലാത്തതിനാല്‍ തല കുനിച്ചിരിക്കേണ്ട ഗതികേടാണെന്നും മുല്ലപ്പള്ളി ജില്ലാനേതൃയോഗത്തില്‍ വിമര്‍ശിച്ചു.