കോതമംഗലം: സുപ്രീം കോടതി വിധി അനുസരിച്ച് കോതമംഗലം മാര്‍ത്തോമ ചെറിയ പള്ളിയില്‍ പ്രവേശിക്കാന്‍ ഓര്‍ത്തഡോക്‌സ് വിഭാഗം എത്തിയതിനെ തുടര്‍ന്ന് സ്ഥലത്ത് സംഘര്‍ഷം. രാവിലെ പത്തരയോടെ തോമസ് പോള്‍ റമ്പാന്റെ നേതൃത്വത്തിലാണ് ഓര്‍ത്തഡോക്‌സ് വിഭാഗം എത്തിയത്. ഇവരെ പ്രവേശിപ്പിക്കില്ലെന്നു പ്രഖ്യാപിച്ച് യാക്കോബായ വിഭാഗം പ്രദേശത്ത് തടിച്ചുകൂടിയിരിക്കുകയാണ്.

സുപ്രീംകോടതി ഉത്തരവ് നടപ്പാക്കാന്‍ സഹകരിക്കണമെന്നും അല്ലെങ്കില്‍ ബലപ്രയോഗം നടത്തേണ്ടി വരുമെന്നും മൂവാറ്റുപ്പുഴ ആര്‍ഡിഒ മൈക്കിലൂടെ ജനങ്ങളെ അറിയിച്ചു. എന്നാല്‍ ഇതിനെ മുദ്രാവാക്യം വിളിച്ചുകൊണ്ടാണ് വിശ്വാസികള്‍ നേരിട്ടത്. പള്ളിക്ക് പുറത്ത് വന്‍ പൊലീസ് സന്നാഹം ക്യാമ്പ് ചെയ്യുന്നുണ്ട്. 

സുപ്രീം കോടതി വിധി നടപ്പാക്കുന്നതിന് പൊലീസ് സംരക്ഷണം തേടി ഓര്‍ത്തഡോക്‌സ് വിഭാഗം നേരത്തെ കോടതിയെ സമീപിച്ചിരുന്നു. ഇതു പ്രകാരം തോമസ് പോള്‍ റമ്പാന് സംരക്ഷണം നല്‍കണമെന്ന് കോടതി ഉത്തരവിട്ടിരുന്നു.