തൃശൂർ: കോവിഡ് ബാധിച്ച് ഷാർജയിൽ മലയാളി മരിച്ചു. തൃശൂർ മതിലകം പുതിയകാവ്  സ്വദേശി പഴുന്തറ തേപറമ്പിൽ പരേതനായ അമ്മുഞ്ഞിയുടെയും കൈയ്യയുടേയും മകൻ അബ്ദുൽ റസാഖ് (ഷുക്കൂർ 49) ആണ് മരിച്ചത്. 

ഷാർജയിൽ കൺസ്ട്രക്ഷൻ കമ്പനിയിൽ ഡ്രൈവറായിരുന്നു അബ്ദുൽ റസാഖ്. നേരത്തേ മുതൽ പ്രമേഹ ബാധിതനായിരുന്നു. റമസാൻ വ്രതം അനുഷ്ഠിച്ച് വരുന്നതിനിടെ ശരീര വേദന അനുഭവപ്പെടുകയായിരുന്നു. ഇതേത്തുടർന്ന് നടത്തിയ രക്ത പരിശോധനയിലാണ് കോവിഡ് 19 സ്ഥിരീകരിച്ചത്.

ദുബായ് അൽബറഹ ആശുപത്രിയിൽ ചികിത്സയിലിരിക്കെ വെളളിയാഴ്ച രാത്രി 11.30ഓടെയായിരുന്നു മരണം. ഖബറടക്കം കോവിഡ് പ്രോട്ടോക്കോൾ അനുസരിച്ച് ഗൾഫിൽ നടക്കും.