അബുദാബി: ഗൾഫിൽ കോവിഡ് ബാധിച്ച് ഇന്ന് മൂന്ന് മലയാളികൾ മരിച്ചു. ഇതോടെ ​ഗൾഫിൽ മരിച്ച മൊത്തം മലയാളികളുടെ എണ്ണം 200 ആയി. സിനിമാ നടനും വ്യവസായിയുമായ ആലുവ സ്വദേശി എസ്എ ഹസൻ റാസൽഖൈമയിൽ മരിച്ചു. 51വയസായിരുന്നു.

കോവിഡ് സ്ഥിരീകരിച്ച് ആശുപത്രിയിൽ ചികിത്സയിൽ കഴിയുന്നതിനിടെയാണ് ഹസൻ മരിച്ചത്. ദുബായിക്കാരൻ എന്ന സിനിമ നിർമിക്കുകയും അഭിനയിക്കുകയും ചെയ്തിരുന്നു. ഇതോടെ യുഎഇയിൽ മരിച്ച മലയാളികളുടെ എണ്ണം 92 ആയി.

പത്തനംതിട്ട മല്ലപ്പള്ളി സ്വദേശി പിഎ താജുദീൻ സൗദി അറേബ്യയിലെ ജിദ്ദയിലാണ് മരിച്ചത്. 50 വയസായിരുന്നു. സൗദിയിൽ 57 മലയാളികളാണ് മരിച്ചത്.

കണ്ണൂർ ചേലേരി സ്വദേശി 50കാരൻ സിദ്ദിഖ് ഖത്തറിൽ മരിച്ചു. ഇതോടെ ഖത്തറിൽ മരിച്ച മലയാളികളുടെ എണ്ണം ആറായി. ഏപ്രിൽ ഒന്നിന് യുഎഇയിലാണ് ഗൾഫിൽ ആദ്യമായി കോവിഡ് ബാധിച്ച് മലയാളി മരിച്ചത്.