തിരുവനന്തപുരം: ഇരുണ്ട യുഗത്തിലേക്ക് തിരിച്ച് പോകാനില്ലെന്ന് മുഖ്യമന്ത്രി പിണറായി വിജയന്‍. തിരുവനന്തപുരം മുതല്‍ കാസര്‍കോട് വരെ ബഹുജന സംഘടനകളെ അണിനിരത്തി  വനിതാമതില്‍ സംഘടിപ്പിക്കുമെന്നും മുഖ്യമന്ത്രി വ്യക്തമാക്കി. സമുദായ നേതാക്കളെ വിളിച്ച് ചേര്‍ത്ത യോഗത്തിലാണ് തീരുമാനം. ശബരിമല വിഷയത്തില്‍ ബിജെപിയുടെ സമരങ്ങളെ പ്രതിരോധിക്കാന്‍ ഇതിലൂടെ കഴിയുമെന്നാണ് പ്രതീക്ഷിക്കുന്നത്. 

എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി ചെയര്‍മാനും കെപിഎംഎസ് സംസ്ഥാന ജനറല്‍ സെക്രട്ടറി പുന്നല ശ്രീകുമാര്‍ കണ്‍വീനറുമായ സംഘാടക സമിതിയെ ഇതിനായി നിയോഗിച്ചിട്ടുണ്ട്. സമുദായ സംഘടനകളുടെ യോഗത്തില്‍ എന്‍എസ്എസ് പങ്കെടുക്കേണ്ടതായിരുന്നുവെന്നും മുഖ്യമന്ത്രി അഭിപ്രായപ്പെട്ടു. 

രാജ്യം ശ്രദ്ധിക്കുന്ന പരിപാടിയാക്കി ഇതിനെ മാറ്റുമെന്നും കേരളത്തെ വീണ്ടും മറ്റൊരു ഭ്രാന്താലയമാക്കി മാറ്റരുതെന്ന് പറയാനാണ് വനിതാ മതിലിലൂടെ ഉദ്ദേശിക്കുന്നതെന്നും അദ്ദേഹം വ്യക്തമാക്കി. നവോത്ഥാന മൂല്യങ്ങളുടെ സംരക്ഷണവും തുടര്‍ച്ചയും ലക്ഷ്യമാക്കി മുഖ്യമന്ത്രി വിളിച്ചു ചേര്‍ത്ത യോഗത്തില്‍ 190 ഓളംസാമുദായിക സംഘടനാ പ്രതിനിധികള്‍ക്കാണ് ക്ഷണമുണ്ടായിരുന്നത്.