കാഞ്ഞങ്ങാട്: ഡല്ഹി ജവഹര്ലാല് നെഹ്റു യൂണിവേഴ്സിറ്റി കാംപസ് ഗര്ഭനിരോധന ഉറകള് കൊണ്ടു നിറഞ്ഞിരിക്കുകയാണന്ന് മുന് ഡിജിപി ടിപി സെന്കുമാര്. അവിടെ പെണ്കുട്ടികള് ആണുങ്ങളുടെ ഹോസ്റ്റലിലാണ് ഉറങ്ങുന്നതെന്നും സെന്കുമാര് പറഞ്ഞതായി ന്യൂ ഇന്ത്യന് എക്സ്പ്രസ് റിപ്പോര്ട്ട് ചെയ്യുന്നു.
''ജെഎന്യുവില് ആണുങ്ങളുടെ ഹോസ്റ്റല് ടൊയ്ലറ്റില്നിന്ന് പെണ്കുട്ടികള് ഇറങ്ങിവരുന്നത് ഞാന് കണ്ടിട്ടുണ്ട്. നാല്പ്പതു വര്ഷം മുമ്പാണത്'' -സെന്കുമാര് പറഞ്ഞു.
കാംപസ് ഗര്ഭനിരോധന ഉറകള് കൊണ്ട് നിറഞ്ഞിരിക്കുകയായിരുന്നു. അത്തരം ഒരു സര്വകലാശാല നമുക്ക് ആവശ്യമില്ലെന്ന് സെന്കുമാര് പറഞ്ഞു. ജെഎന്യു ഹോസ്റ്റല് ഫീസുകള് വര്ധിപ്പിച്ചത് പിന്വലിക്കണമെന്ന ആവശ്യത്തോട് യോജിപ്പുണ്ടോയെന്ന, ചോദ്യത്തോടു പ്രതികരിക്കുകയായിരുന്നു സെന്കുമാര്. കേന്ദ്ര സര്വകലാശാലയില് ഭരണഘടനയുടെ എഴുപതാം വാര്ഷികത്തോട് അനുബന്ധിച്ചു നടത്തിയ പരിപാടിക്കിടെയായിരുന്നു സെന്കുമാറിന്റെ പരാമര്ശം.
ന്യൂനപക്ഷങ്ങള്ക്ക് വിദ്യാഭ്യാസ സ്ഥാപനങ്ങള് സ്ഥാപിക്കാന് പ്രത്യേക അവകാശം നല്കുന്ന ഭരണഘടനയുടെ 29, 30 അനുച്ഛേദങ്ങള് റദ്ദാക്കണമെന്ന് സെന്കുമാര് ആവശ്യപ്പെട്ടു. രാജ്യത്തെ ജനങ്ങള്ക്കിടയില് ന്യൂനപക്ഷ, ഭൂരിപക്ഷ വേര്തിരിവ് ഉണ്ടാക്കുന്നതാണ് രണ്ട് അനുച്ഛേദങ്ങളുമെന്ന് അദ്ദേഹം പറഞ്ഞു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates