ആലുവ: നടന്‍ ദിലീപിന്റെ ഉടമസ്ഥതയിലുള്ള സിനിമാ തിയേറ്റര്‍ ഡി സിനിമാസിന് നിര്‍മ്മാണ അനുമതി നല്‍കിയത് അന്വേഷിക്കുമെന്ന് മന്ത്രി കെടി ജലീല്‍ പറഞ്ഞു. ആലുവയില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം. കരമടക്കാത്ത ഭൂമിയില്‍ എങ്ങനെ നിര്‍മ്മാണ പ്രവര്‍ത്തനങ്ങള്‍ നടന്നുവെന്നതിനെപ്പറ്റിയായിരിക്കും പ്രധാന അന്വേഷണം. 

ചാലക്കുടി നഗരസഭയിലാണ് തിയേറ്റര്‍ സ്ഥിതിചെയ്യുന്നത്. അതേസമയം ഇതുമായി ബന്ധപ്പെട്ട് ഇതുവരെ പരാതികളൊന്നും ലഭിച്ചിട്ടില്ല. അന്വേഷണ ഘട്ടങ്ങളില്‍ ബന്ധപ്പെട്ട ഫയലുകള്‍ കാണാതാവുന്നതിനെ കുറിച്ചും അന്വേഷണം നടത്തുമെന്നും കെടി ജലീല്‍ അറിയിച്ചു. 

സംസ്ഥാന രൂപീകരണത്തിനു മുന്‍പ് തിരു -കൊച്ചി മന്ത്രിസഭ ചാലക്കുടി ശ്രീധരമംഗലം ശ്രീകൃഷ്ണ ക്ഷേത്രത്തിന് ഊട്ടുപുര നിര്‍മിക്കാന്‍ കൈമാറിയ ഒരേക്കര്‍ സ്ഥലം 2005ല്‍ എട്ട് ആധാരങ്ങളുണ്ടാക്കി ദിലീപ് കൈവശപ്പെടുത്തിയെന്നാണു ആരോപണം. ഈ ഭൂമിയില്‍ 35 സെന്റ് ചാലക്കുടി തോടു പുറമ്പോക്കും ഉള്‍പ്പെടുന്നതായുള്ള റവന്യു റിപ്പോര്‍ട്ട് മുക്കിയെന്നും ആക്ഷേപമുയര്‍ന്നിരുന്നു.