വയനാട് : അതിർത്തി കടക്കാൻ തിരുത്തിയ പാസുമായി എത്തിയ ആൾ അറസ്റ്റിലായി. മലപ്പുറം ചുങ്കത്തറ സ്വദേശി അഖിൽ ടി റെജിയാണ് അറസ്റ്റിലായത്. മുത്തങ്ങ ചെക്ക്പോസ്റ്റിലാണ് തിരുത്തിയ പാസ്സുമായി ഇയാൾ എത്തിയത്. മഞ്ചേശ്വരം വഴി വരാനുള്ള പാസ്സ് തിരുത്തി ഇയാൾ മുത്തങ്ങ എന്നാക്കുകയായിരുന്നു. പാസ്സിലെ തീയതിയും തിരുത്തിയതായി പൊലീസ് കണ്ടെത്തി.

പകർച്ചവ്യാധി പ്രതിരോധ നിയമപ്രകാരമാണ് ഇയാൾക്കെതിരെ പൊലീസ് കേസെടുത്തത്. വ്യാജരേഖ ചമച്ചു എന്ന കുറ്റവും ഇയാൾക്കെതിരെ ചുമത്തുമെന്ന് പൊലീസ് അറിയിച്ചു.

അതിർത്തി കടക്കാൻ ഇന്നും പാസ്സില്ലാതെ നിരവധി പേർ എത്തിയതായി റിപ്പോർട്ടുണ്ട്. തമിഴ്നാട്ടിൽ നിന്നാണ് കൂടുതൽ പേരും എത്തിയത്. എന്നാൽ പാസ് ലഭിക്കാത്തവരെ സംസ്ഥാനത്തേക്ക് കടത്താനാകില്ലെന്ന കടുത്ത നിലപാടിലാണ് സർക്കാർ. പാസ്സില്ലാതെ ആളുകളെ കടത്തുന്നത് ഇതുവരെ സംസ്ഥാനം നടത്തിയ കോവിഡ് പ്രതിരോധപ്രവർത്തനങ്ങളെ ഇല്ലാതാക്കുന്നതിന് തുല്യമാകുമെന്ന് സർക്കാർ ഹൈക്കോടതിയെ അറിയിച്ചിരുന്നു.