ആലുവ: ഇരട്ടക്കൊലപാതക കേസിലെ പ്രതിയായിരുന്ന വ്യക്തി ആലുവ സബ് ജയിലില്‍ ദിലീപിനെ കാണാന്‍ എത്തിയെന്ന് ആരോപണം. ഇപ്പോള്‍ ചിട്ടിക്കമ്പനി ഉടമയായ ഇയാള്‍ ജയിലില്‍ എത്തിയത് ദിലീപിനെ സഹായിക്കാന്‍ ആണെന്നാണ് ആരോപണം ഉയരുന്നത്. 

സന്ദര്‍ശകര്‍ക്ക് അനുവാദം ഇല്ലാത്ത ഞായറാഴ്ച ജയില്‍ സൂപ്രണ്ടിന്റെ ഒത്താശയോടെയാണ് ഇയാള്‍ ജയിലിലെത്തിയത്. അവധി ദിവസമായ ഞായറാഴ്ച ആയിട്ടും ജയില്‍ സൂപ്രണ്ട് പി.പി.ബാബുരാജ് ഞായറാഴ്ച ജയിലില്‍ എത്തിയിരുന്നു. 

മുക്കാല്‍ മണിക്കൂറോളം ഇയാള്‍ ദിലീപുമായി കൂടിക്കാഴ്ച നടത്തിയെന്നാണ് വാര്‍ത്തകള്‍. എന്നാല്‍ ഇയാള്‍ ദിലീപിനെ കാണുന്നതിന് അല്ല, തന്നെ കാണാനാണ് എത്തിയതെന്നാണ് ജയില്‍ സൂപ്രണ്ടിന്റെ നിലപാട്. ബന്ധുക്കള്‍ക്ക് മാത്രമാണ് ദിലീപിനെ സന്ദര്‍ശിക്കാന്‍ അനുവാദം ഉണ്ടായിരുന്നത്. 

ചിട്ടിക്കമ്പനി ഉടമയുടെ സന്ദര്‍ശനം ജയിലില്‍ നടന് കൂടുതല്‍ സൗകര്യങ്ങള്‍ ഒരുക്കുന്നതിന് വേണ്ടിയായിരുന്നു എന്നും ആരോപണം ഉയരുന്നുണ്ട്. ജയില്‍ അധികൃതരെ സ്വാധീനിച്ച് നടന് ജയിലില്‍ സൗകര്യങ്ങള്‍ ഒരുക്കി നല്‍കാന്‍ വേണ്ടിയായിരുന്നു സന്ദര്‍ശനം എന്ന ആരോപണത്തെ കുറിച്ച് ജയില്‍ വകുപ്പ് അനൗദ്യോഗിക അന്വേഷണം ആരംഭിച്ചിട്ടുണ്ടെന്നുമാണ് സൂചന.