തിരുവനന്തപുരം: സംസ്ഥാന നിയമസഭയുടെ, അന്വേഷണാത്മക മാധ്യമ പ്രവര്‍ത്തനത്തിനുള്ള ഇകെ നായനാര്‍ പുരസ്‌കാരം സമകാലിക മലയാളം വാരിക പത്രാധിപ സമിതി അംഗം രേഖാ ചന്ദ്രയ്ക്ക് ഗവര്‍ണര്‍ ആരിഫ് മുഹമ്മദ് ഖാന്‍ സമ്മാനിച്ചു. ചടങ്ങില്‍ മുഖ്യമന്ത്രി പിണറായി വിജയന്‍, സ്പീക്കര്‍ ശ്രീരാമകൃഷ്ണന്‍ എന്നിവരും സന്നിഹിതരായിരുന്നു. നിയമസഭ ബാങ്ക്വറ്റ് ഹാളില്‍ നടന്ന ചടങ്ങിലാണ് പുരസ്‌കാരം സമ്മാനിച്ചത്.

കഴിഞ്ഞ വര്‍ഷം മെയ് 28, ജൂണ്‍ 4 ലക്കങ്ങളില്‍ പ്രസിദ്ധീകരിച്ച മാന്തോപ്പുകളിലെ വിഷമരണങ്ങള്‍ എന്ന റിപ്പോര്‍ട്ടിനാണ് പുരസ്‌കാരം. അന്‍പതിനായിരം രൂപയും പ്രശസ്തി പത്രവുമാണ് പുരസ്‌കാരം. പാലക്കാട്ടെ മാന്തോപ്പുകളിലെ എന്‍ഡോസള്‍ഫാന്‍ പ്രയോഗം മൂലമുണ്ടായ ദുരിതവും അതിന്റെ ഇരകളെയും വെളിച്ചത്തുകൊണ്ടുവന്ന റിപ്പോര്‍ട്ടാണ്, രണ്ടു ലക്കങ്ങളിലായി പ്രസിദ്ധീകരിച്ച മാന്തോപ്പുകളിലെ വിഷമരണങ്ങള്‍.