വാഷിങ്ടൻ: ന്യൂയോർക്കിൽ കോവിഡ് വാർഡിൽ ചികിത്സയിലായിരുന്ന കാഞ്ഞിരമറ്റം സ്വദേശി മരിച്ചു. 72 വയസ്സുള്ള ജോസഫ് കെ. തോമസ് (കുഞ്ഞേപ്പച്ചൻ) ആണ് മരിച്ചത്. ഇന്നലെ പുലർച്ചെയാണ് മരണം.  

ന്യൂയോർക്കിൽ നിര്യാതനായ ബന്ധുവിന്റെ സംസ്കാരചടങ്ങിൽ കഴിഞ്ഞ ദിവസം ജോസഫ് പങ്കെടുത്തിരുന്നു. തുടർന്ന് വീട്ടിലെത്തിയ അദ്ദേഹത്തിന് പനി അനുഭവപ്പെട്ടു. ആശുപത്രിയിൽ പ്രവേശിപ്പിച്ച ജോസഫിനെ കോവിഡ് വാർഡിലാണ് പ്രവേശിപ്പിച്ചതെന്ന് ബന്ധുക്കൾ പറഞ്ഞു. പരിശോധനയിൽ ഫലം നെഗറ്റീവ് ആയിരുന്നു. 

ന്യൂയോർക്കിൽ ഫിസിഷ്യന്‍ അസിസ്റ്റന്റ് ആയ ഇന്ത്യക്കാരിയും ഇന്നലെ കോവിഡ് ബാധിച്ച് മരിച്ചു. ഫിസിഷ്യന്‍ അസിസ്റ്റന്റ് മാധവി ആയ (61) ആണ് മരിച്ചത്.

കോവിഡ് ബാധിച്ച് ഒരുദിവസം ഏറ്റവുമധികം പേർ മരിച്ച രാജ്യമായി മാറിയിരിക്കുകയാണ് യുഎസ്. 24 മണിക്കൂറിനകം 1100 പേർ രാജ്യത്ത് മരിച്ചെന്നാണ് റിപ്പോർട്ട്. ഇതോടെ ആകെ മരണം 6,000 കവിഞ്ഞു. ന്യൂയോർക്കിൽ മാത്രം ഒരുലക്ഷത്തിലേറെ പേർക്ക് രോ​ഗം സ്ഥിരീകരിച്ചിട്ടുണ്ട്. 2500 ലേറെ മരണം സംഭവിച്ച ന്യൂയോർക്കിൽ രാത്രി വൈകിയും കൂട്ടസംസ്കാരങ്ങൾ നട‌ത്തുന്നുണ്ട്.