തൃശ്ശൂര്‍: ചാവക്കാട് കോണ്‍ഗ്രസ് പ്രവര്‍ത്തകന്‍ നൗഷാദിനെ വെട്ടിക്കൊലപ്പെടുത്തിയ കേസിലെ മുഖ്യപ്രതി ജമാല്‍ പിടിയില്‍. എസ്‍ഡിപിഐ ചാവക്കാട് ഏരിയ സെക്രട്ടറിയാണ് പിടിയിലായ ജമാല്‍. പുന്ന സ്വദേശിയാണ് ഇയാൾ. 

കൊലപാതകത്തിന് ശേഷം ഒളിവിലായിരുന്ന ജമാലിനെ തമിഴ്‍നാട്ടില്‍ നിന്നാണ് പൊലീസ് പിടികൂടിയത്. പൊള്ളാച്ചി, മധുര,കോയമ്പത്തൂര്‍ തുടങ്ങിയ സ്ഥലങ്ങളില്‍ ഈ ദിവസങ്ങളിൽ ഇയാൾ ഒളിച്ചുക്കഴിഞ്ഞു. ജമാല്‍ പിടിയിലായതോടെ നൗഷാദ് വധത്തില്‍ അറസ്റ്റിലായവരുടെ എണ്ണം ആറായി.

കേസിലെ പ്രധാന പ്രതികളിലൊരാളായ വടക്കേക്കാട് സ്വദേശി ഫെബീർ, മറ്റ് പ്രതികളായ ഫൈസൽ, മുഹമ്മദ് മുസ്തഫ്, ഫാമിസ് അബൂബക്കർ, മുബീൻ എന്നിവരെ അന്വേഷണ സംഘം നേരത്തെ അറസ്റ്റ് ചെയ്തിരുന്നു. കേസില്‍ ആകെ 20 പ്രതികളാണുളളത്. 

ജൂലൈ 30നാണ് ചാവക്കാട് പുന്നയില്‍ നൗഷാദ് ഉള്‍പ്പടെ നാല് കോണ്‍ഗ്രസ് പ്രവര്‍ത്തകര്‍ക്ക് വെട്ടേറ്റത്. രാത്രി ഒൻപത് ബൈക്കുകളിലായെത്തിയ അക്രമി സംഘം വടിവാൾ കൊണ്ട് ഇവരെ വെട്ടുകയായിരുന്നു.