പാലക്കാട്: പാലക്കാട് ജില്ലയില്‍ ഇന്ന് സ്വകാര്യ ബസ് പണിമുടക്ക്. വേരിയബിള്‍ ഡിഎ കുടിശ്ശിക ഉടന്‍ നല്‍കണമെന്നാവശ്യപ്പെട്ടാണ് ബസ് തൊഴിലാളികൾ സമരം നടത്തുന്നത്. സംയുക്തട്രേഡ് യൂണിയനാണ് ജില്ലയില്‍ സമരത്തിന് ആഹ്വാനം ചെയ്തത്. 

മൂന്നു ഗഡു കുടിശികയാണ് തൊഴിലാളികൾക്കു ലഭിക്കാനുള്ളത്. വ്യാഴാഴ്ച ജില്ലാ ലേബർ ഓഫിസർ എം കെ രാമകൃഷ്ണന്റെ സാന്നിധ്യത്തിൽ ബസ് ഉടമകളും തൊഴിലാളി സംഘടനാ പ്രതിനിധികളും ചർച്ച നടത്തിയെങ്കിലും വിജയിച്ചില്ല. 

നിലവിലെ പ്രതിസന്ധികളുടെ സാഹചര്യത്തിൽ ബസ് ചാർജ് വർധിപ്പിക്കാതെ കുടിശിക അനുവദിക്കാൻ കഴിയില്ലെന്ന നിലപാടിലാണ് ഉടമകളുടെ സംഘടന.