തിരുവനന്തപുരം : ദേശാഭിമാനി റസിഡന്റ് എഡിറ്റര്‍ പി എം മനോജിനെ മുഖ്യമന്ത്രി പിണറായി വിജയന്റെ അഡീഷണല്‍ പ്രൈവറ്റ് സെക്രട്ടറിയായി നിയമിക്കാന്‍ സിപിഎം സംസ്ഥാന സെക്രട്ടേറിയറ്റ് തീരുമാനിച്ചു. ഉത്തരവ് അടുത്തദിവസം പുറത്തിറങ്ങും. 

മുഖ്യമന്ത്രിയുടെ അഡീഷണല്‍ പ്രൈവറ്റ് സെക്രട്ടറിയായിരുന്ന ടി വേലായുധന്‍ വ്യക്തിപരമായ കാരണങ്ങളാല്‍ കഴിഞ്ഞദിവസം രാജിവച്ചിരുന്നു. ഈ സ്ഥാനത്തേക്ക് പി എം മനോജിനെ മുഖ്യമന്ത്രിതന്നെയാണ് നിര്‍ദേശിച്ചതെന്നാണ് സൂചന. 

ദേശാഭിമാനി ചീഫ് എഡിറ്റര്‍ പി രാജീവുമായുള്ള ഭിന്നതയെ തുടര്‍ന്നാണ് പി എം മനോജിനെ ദേശാഭിമാനിയില്‍ നിന്നും മാറ്റിയതെന്ന് പ്രചാരണങ്ങള്‍ ഉണ്ടായിരുന്നു. എന്നാല്‍  ഇക്കാര്യത്തില്‍ സ്ഥിരീകരണമില്ല.