തിരുവനന്തപുരം: പി.കെ.ശശി എം.എൽ.എയ്‌ക്കെതിരായ ലൈംഗിക പീഡന ആരോപണത്തിൽ കേസെടുക്കുന്നത് സംബന്ധിച്ച് സംസ്ഥാന പൊലീസ് മേധാവി നിയമോപദേശം തേടി. യുവതി നേരിട്ട് പരാതി നൽകാത്തതിനാൽ തുടർ നടപടികൾ എങ്ങനെ വേണമെന്ന് തീരുമാനിക്കാനാണ് നിയമോപദേശം തേടിയത്. പാലക്കാട് ജില്ലാ പൊലീസ് മേധാവിയുടെ ചുമതല വഹിക്കുന്ന മലപ്പുറം ജില്ലാ പൊലീസ് മേധാവി പ്രതീഷ്‌കുമാറിന് ഉത്തരവ് കൈമാറി. ആരോപണം ഉന്നയിച്ച പെൺകുട്ടിയുടെയോ കുടുംബത്തിന്റെയോ പരാതി ഇതുവരെ പൊലീസിന് ലഭിച്ചിട്ടില്ലെന്നും മാധ്യമ വാർത്തകളുടെ പശ്ചാത്തലത്തിൽ പ്രാഥമികാന്വേഷണം നടത്തി ഐ.ജിക്ക് റിപ്പോർട്ട് സമർപ്പിക്കുമെന്നും പ്രതീഷ്‌കുമാർ വ്യക്തമാക്കി.

ആരോപണത്തിൽ കെ.എസ്.യുവും യുവമോർച്ചയും നൽകിയ പരാതിയിൽ പ്രാഥമികാന്വേഷണം നടത്തി റിപ്പോർട്ട് സമർപ്പിക്കാൻ റേഞ്ച് ഐ.ജി എം.ആർ. അജിത്കുമാറിന് ഡി.ജി.പി ലോക്‌നാഥ് ബെഹ്‌റ നിർദ്ദേശം നൽകിയിട്ടുണ്ട്. പ്രായപൂർത്തിയായ ഇര നേരിട്ട് പരാതി നൽകാത്തതിനാൽ ശശിക്കെതിരെ നിയമ നടപടികൾ സ്വീകരിക്കാനുള്ള സാധ്യത വിരളമാണെന്ന് നിയമവൃത്തങ്ങൾ സൂചിപ്പിക്കുന്നു.