തിരുവനന്തപുരം : ദുരൂഹ സാഹചര്യത്തില്‍ പൊട്ടക്കിണറ്റില്‍ മരിച്ച നിലയില്‍ കണ്ടെത്തിയ യുവാവ് ധരിച്ചിരുന്ന ഷര്‍ട്ട് ഏതാനും ദിവസങ്ങള്‍ക്ക് ശേഷം വീടിനു സമീപത്തെ മരച്ചുവട്ടില്‍ പ്രത്യക്ഷപ്പെട്ടു. വെള്ളാണിക്കല്‍ പത്തേക്കര്‍ രാജേഷ് ഭവനില്‍ രാജേഷി(35)നെ ശനിയാഴ്ചയാണ് വീട്ടില്‍ നിന്നും അകലെയുള്ള കിണറ്റില്‍ മരിച്ച നിലയില്‍ കണ്ടെത്തിയത്. 

അപ്പോള്‍ മൃതദേഹത്തില്‍ അടിവസ്ത്രം മാത്രമാണുണ്ടായിരുന്നത്. കിണറ്റില്‍ നിന്നും വസ്ത്രങ്ങള്‍ കണ്ടെത്താനുമായില്ല. അപ്പോള്‍ ധരിച്ചിരുന്നതെന്ന് കരുതുന്ന ഷര്‍ട്ടാണ് ഇന്നലെ രാവിലെ രാജേഷിനെ സംസ്‌കരിച്ചതിനു എതിര്‍വശത്തുള്ള പൊതു വഴിക്കു സമീപത്തെ മരച്ചുവട്ടില്‍ കണ്ടെത്തിയത്. 

രാജേഷിനെ വെള്ളി മുതലാണ് കാണാതായത്. മൃതദേഹം കണ്ടെത്തി ഏതാനും ദിവസങ്ങള്‍ക്കുശേഷം ധരിച്ച ഷര്‍ട്ട് പ്രത്യക്ഷപ്പെട്ടതോടെ, രാജേഷിന്റെ മരണത്തില്‍ ദുരൂഹതയുണ്ടെന്ന് ആരോപിച്ച് നാട്ടുകാര്‍ രംഗത്തെത്തി. വെഞ്ഞാറമൂട് പൊലീസ് എത്തി ഷര്‍ട്ട് സ്‌റ്റേഷനിലേക്ക് മാറ്റി. സംഭവത്തില്‍ പൊലീസ് അന്വേഷണം തുടങ്ങി.