വടകര: വടകരയിൽ യുവാവിനെ കെട്ടിയിട്ട് ന​ഗ്നനാക്കി മർദ്ദിച്ച സംഭവത്തിൽ പ്രതികൾ അറസ്റ്റിൽ. ബം​ഗളുരുവിൽ നിന്നും നാലം​ഗ സംഘത്തെയാണ് പൊലീസ് പിടികൂടിയത്. കഴിഞ്ഞ മാസം 11നാണ് കേസിനാസ്പദമായ സംഭവം ഉണ്ടായത്. കൈനാട്ടി സ്വദേശികളായ അഫ്നാസ്, മൊയ്തീൻ, നജാഫ്, അജിനാസ് എന്നിവരാണ് ‌‌ പൊലീസ് വി‌രിച്ച വലയിൽ വീണത്. 

 പ്രതികളിലൊരാളിന്റെ ബന്ധുവായ പെൺകുട്ടിയെ പ്രണയിച്ചതിനാണ് യുവാവിനെ ന​ഗ്നനാക്കി മർദ്ദിച്ചത് അപമാനിച്ചത്. ഇയാളുടെ സുഹൃത്തിനെയും നാലം​ഗസംഘം ആക്രമിച്ചു. ആളൊഴിഞ്ഞ മൈതാനത്ത്  വച്ചാണ് യുവാവിനെ മർദ്ദിച്ചത്. ഇതിന് പിന്നാലെ ഇയാളുടെ സുഹൃത്തിനെയും വിളിച്ചു വരുത്തി ആക്രമിച്ചു. ഇതിന് പുറമേ ന​ഗ്നരാക്കി കെട്ടിയിട്ട നിലയിലുള്ള ഇരുവരുടെയും ചിത്രങ്ങൾ പ്രതികൾ സമൂഹമാധ്യമങ്ങളിൂടെ പ്രചരിപ്പിക്കുകയും ചെയ്തതായി പൊലീസ് പറയുന്നു. 
പ്രതികളെ ഒളിവിൽ കഴിയാൻ സഹായിച്ച മൂന്ന് പേരെ പൊലീസ് നേരത്തെ അറസ്റ്റ് ചെയ്തിരുന്നു. ഇവരിൽ നിന്ന് ലഭിച്ച വിവരങ്ങളുടെ അടിസ്ഥാനത്തിലാണ് തെരച്ചിൽ ബം​ഗളുരുവിലേക്ക് കൂടി വ്യാപിപ്പിച്ചത്.