ചേര്‍ത്തല: എംഎല്‍എയുടെ കരച്ചില്‍ കേട്ട് മാധ്യമങ്ങളും രാഷ്ട്രീയക്കാരും രക്ഷാപ്രവര്‍ത്തകരും ചെങ്ങന്നൂരിലേക്ക് പോയതിലൂടെ സജി ചെറിയാനാണ് പ്രളയകാലത്ത് ഗോളടിച്ചതെന്ന് എസ്എന്‍ഡിപി ജനറല്‍ സെക്രട്ടറി വെള്ളാപ്പള്ളി നടേശന്‍. ഏറ്റവും കൂടുതല്‍ നാശമുണ്ടായ കുട്ടനാട്ടിലെ എംഎല്‍എയെ ഒരിടത്തും കാണാന്‍ ഇല്ലായിരുന്നുവെന്നും വെള്ളാപ്പള്ളി പറഞ്ഞു

മുഖ്യമന്ത്രി പിണറായി വിജയന്‍ ബുദ്ധിപരവും പക്വവുമായി പ്രവര്‍ത്തിച്ചതു കാരണമാണ് പ്രളയദുരന്തത്തെ ഫലപ്രദമായി നേരിടാനായത്. ഒന്നായാലേ നന്നാകൂ എന്ന ചിന്ത എല്ലാവരിലും ഉണ്ടായി. പ്രതിപക്ഷം എന്നൊരു പക്ഷം ഉണ്ടെന്നു കാണിക്കാനുള്ള വിമര്‍ശനങ്ങള്‍ മാത്രമാണ് അവര്‍ ഉന്നയിച്ചതെന്നും വെള്ളാപ്പള്ളി പറഞ്ഞു.

വിദേശഫണ്ട് ലഭിച്ചില്ലെങ്കില്‍ പോലും കേരളത്തില്‍ നിന്ന് ഫണ്ട് കണ്ടെത്താന്‍ പിണറായി വിജയന്റെ പ്രവര്‍ത്തനത്തിലൂടെ കഴിയും. പ്രളയം നാശമുണ്ടാക്കിയിടത്തെല്ലാം എംഎല്‍എമാരും മന്ത്രിമാരും സജീവമായി ഇടപെട്ടപ്പോള്‍ കുട്ടനാട്ടിലെ എംഎല്‍എയെ കണ്ടില്ല. എസ്എന്‍ഡിപിയുടെ നേതൃത്വത്തില്‍ സഹായനിധി സ്വരൂപിക്കുന്നുണ്ടെന്നും എസ്എന്‍ ട്രസ്റ്റ് വാര്‍ഷികയോഗത്തിന് ശേഷം വെള്ളാപ്പള്ളി പറഞ്ഞു