തിരുവനന്തപുരം: പ്ലസ് വൺ പ്രവേശനത്തിന് മറ്റന്നാൾ (മെയ് പത്ത്)  മുതൽ അപേക്ഷ നൽകാം. 20ന് ട്രയൽ അലോട്ട്മെന്റ് നടക്കും. ആദ്യ അലോട്ട് മെന്റ് 24നും നടക്കും. 

ജൂൺ മൂന്നിനാണ് ഇത്തവണ ക്ലാസുകൾ ആരംഭിക്കുന്നത്. പ്ലസ് വൺ ക്ലാസുകളും ജൂൺ മൂന്നിന് തന്നെ തുടങ്ങും. ഇതാദ്യമായാണ് ഒന്നാം ക്ലാസ് മുതൽ 12ാം ക്ലാസ് വരെ ഒരേ ദിവസം ക്ലാസുകൾ ആരംഭിക്കുന്നതെന്ന് പൊ​തു​വി​ദ്യാ​ഭ്യാ​സ സെ​ക്ര​ട്ട​റി അറിയിച്ചു. 

ഹയർ സെക്കൻഡറിയിൽ ഇത്തവണ 84.33 ആണ് വിജയ ശതമാനം. 3,11,375 പേർ ഉപരിപഠനത്തിന് യോ​ഗ്യത നേടി. സർക്കാർ സ്കൂള‌ുകളിൽ 83.04 ശതമാനം വിജയം നേടി. 71 സ്കൂളുകൾ നൂറു മേനി വിജയം സ്വന്തമാക്കി. സ്പെഷൽ സ്കൂളുകളിൽ 98.64 ശതമാനമാണ് വിജയം. 

കോഴിക്കോട് ജില്ലയിലാണ് ഏറ്റവും കൂടുതൽ വിജയ ശതമാനം  87.44 ശതമാനം. ഏറ്റവും കുറവ് പത്തനംതിട്ട ജില്ലയിലാണ്. 78 ശതമാനം. എയ്ഡഡ് മേഖലയിൽ 86.36 ശതമാനവും അൺ എയ്ഡഡ് മേഖലയിൽ 77.34 ശതമാനവുമാണ് വിജയം. 14,224 കുട്ടികൾക്ക് എല്ലാ വിഷയത്തിലും എ പ്ലസ് ലഭിച്ചിട്ടുണ്ട്.