തിരുവനന്തപുരം : പൊതു വിപണിയില്‍ വിലക്കയറ്റം കൊണ്ട് പൊറുതിമുട്ടുമ്പോള്‍ സാധാരണക്കാര്‍ ആശ്രയിക്കുന്നത് ജയില്‍ വിഭവങ്ങളെയായിരുന്നു. പോക്കറ്റിന് കോട്ടം തട്ടാത്ത തരത്തിലുള്ള വിലയും മികച്ച ഭക്ഷണ പദാര്‍ത്ഥങ്ങളുമാണ് സാധാരണക്കാരുടെ ഇഷ്ടഭക്ഷണമാക്കി ജയില്‍ വിഭവങ്ങളെ മാറ്റിയത്. എന്നാല്‍ പുതുവര്‍ഷത്തില്‍ ജയില്‍ വിഭവങ്ങളുടെ വിലയും ഉയരുകയാണ്.

ജയിലില്‍ തടവുകാര്‍ ഉല്‍പാദിപ്പിക്കുന്ന ഇഡ്ഢലി മുതല്‍ ബിരിയാണി വരെയുള്ള വിഭവങ്ങള്‍ക്ക് നാളെ (ജനുവരി 1) മുതല്‍ വില കൂടുമെന്ന് ജയില്‍ വകുപ്പ് മേധാവി ഋഷിരാജ് സിങ് അറിയിച്ചു.  അസംസ്‌കൃത വസ്തുക്കളുടെ വില വര്‍ധന മൂലമാണ് വില വര്‍ധിപ്പിക്കുന്നതെന്ന് കാണിച്ച് ഋഷിരാജ് സിങ് ഉത്തരവിറക്കി.

ബിരിയാണിക്ക് 10 രൂപയാണ് കൂട്ടിയത്. കായ വറുത്തതിന്റെ വില പ്രാദേശിക ലഭ്യതയ്ക്കനുസരിച്ചു ജയിലുകള്‍ക്കു തീരുമാനിക്കാം. അതേസമയം ഏറ്റവുമധികം ആവശ്യക്കാരുള്ള ചപ്പാത്തി (20 രൂപ), വെജിറ്റബിള്‍ ബിരിയാണി (40 രൂപ) എന്നിവയ്ക്ക് വില വര്‍ധനയില്ല. മറ്റുള്ളവയുടെയെല്ലാം വില ഏകീകരിച്ചു. കണ്ണൂര്‍ സെന്‍ട്രല്‍ ജയില്‍ സൂപ്രണ്ടാണ് വില വര്‍ധനയ്ക്ക് അനുമതി തേടി ജയില്‍ വകുപ്പിനെ സമീപിച്ചത്.

ഇനം, പുതിയ വില, പഴയ വില എന്ന ക്രമത്തില്‍ ചുവടെ :

ചിക്കന്‍ ബിരിയാണി - 70 (60)
ചിക്കന്‍ കറി - 30 (25)
ചില്ലി ചിക്കന്‍ - 50 (40)
കപ്പയും ബീഫും - 70 (60)
മുട്ടക്കറി - 20 (15)
ഇഡ്ഡലി - 3 (2)
ബ്രഡ് - 25 (22)