കോഴിക്കോട്: ബൈക്കോടിക്കുന്നതിനിടെ ഉറങ്ങിപ്പോയതിനെ തുടർന്ന് യുവാക്കൾ കനോലി കനാലിൽ വീണു. നിസാർ, മൻസൂർ എന്നിവരാണ് അപകടത്തിൽപ്പെട്ടത്. നിസാറാണ് ബൈക്കോടിച്ചിരുന്നത്. രാത്രി 12.10-ഓടെ കാരപ്പറമ്പിലാണ് അപകടം നടന്നത്.  ഏകദേശം പത്തടിയോളം താഴ്ചയുണ്ടായിരുന്ന ഭാഗത്താണ് ഇവർ വീണത്. 

ബീച്ച് അഗ്നി രക്ഷാസ്റ്റേഷനിലെ ഫയർമാൻമാരെത്തിയാണ് ഇരുവരെയും രക്ഷിച്ചത്. എൻ. രമേശൻ, ബിജു പ്രസാദ് എന്നിവരുടെ നേതൃത്വത്തിൽ രണ്ടു യൂണിറ്റ് ഫയർമാൻമാർ രക്ഷാപ്രവർത്തനത്തിനുണ്ടായിരുന്നു. യുവാക്കളെ ഉടൻതന്നെ അടുത്തുള്ള ബീച്ച് ആശുപത്രിയിൽ പ്രവേശിപ്പിച്ചു. ഇരുവർക്കും നിസാര പരിക്കുകൾ മാത്രമാണെന്നാണ് ലഭിക്കുന്ന വിവരം.