ദുബൈ:  ദുബൈ ഡ്യൂട്ടിഫ്രീയുടെ മില്ലേനിയം നറുക്കെടുപ്പില്‍ മലയാളിക്കും കൂട്ടുകാര്‍ക്കും ഭാഗ്യദേവതയുടെ ബംപര്‍ സമ്മാനം. ഏഴ് കോടി രൂപയാണ് (10 ലക്ഷം ഡോളര്‍) കൊല്ലം സ്വദേശിയായ നൗഷാദ് സുബൈറിനും സംഘത്തിനും സമ്മാനമായി ലഭിക്കുക. 

 ദുബൈയിലെ കെമിക്കല്‍ കമ്പനിയായ റെഡ ഗ്രൂപ്പില്‍ ലോജിസ്റ്റിക്‌സ് മാനേജരാണ് നൗഷാദ്. തുല്യമായി പണമിട്ടാണ് കൂട്ടുകാര്‍ചേര്‍ന്ന് ടിക്കറ്റെടുത്തത്. മലപ്പുറം സ്വദേശികളായ സുരേഷ് രഘു, പ്രദീപ്, കോട്ടയം സ്വദേശികളായ നാസര്‍, ഷബീര്‍, പത്തനംതിട്ട സ്വദേശി ചാര്‍ലി എന്നിവരാണ് സമ്മാനം പങ്കിട്ടെടുക്കുന്ന കൂട്ടുകാര്‍. 

 സ്ഥിരമായി ദുബൈ ഡ്യൂട്ടിഫ്രീയുടെ നറുക്കെടുപ്പില്‍ ടിക്കറ്റ് എടുക്കാറുണ്ടായിരുന്നുവെന്നും ഒടുവില്‍ ഭാഗ്യം തുണച്ചതില്‍ സന്തോഷമുണ്ടെന്നും  സുബൈര്‍ പറയുന്നു. 20 വര്‍ഷമായി പ്രവാസിയായ സുബൈര്‍ ഡ്യൂട്ടിഫ്രീയുടെ ഒന്നാം സമ്മാനം നേടുന്ന 137 ആമത്തെ ഇന്ത്യാക്കാരനാണ്.