ഫോര്‍ട്ട്‌കൊച്ചി: മദ്യലഹരിയില്‍ എത്തിയ അയല്‍വാസിയുടെ മര്‍ദ്ദനമേറ്റ് വീട്ടമ്മ മരിച്ചു. ഈരവേലി ചിറപ്പുറം പരേതനായ ഖാലിദിന്റെ ഭാര്യ ബീവി(55) ആണ് മരിച്ചത്. 

അയല്‍വാസിയായ യുവാവ് മദ്യലഹരിയില്‍ ബീവിയുടെ വീട്ടിലേക്ക് എത്തുകയായിരുന്നു. ഈ സമയം മകനൊപ്പം പുറത്തു പോയിരിക്കുകയായിരുന്നു വീട്ടമ്മ. വീട്ടിലേക്ക് ഇവര്‍ തിരികെ എത്തിയപാടെ യുവാവ് ആക്രമിച്ചു. വ്യാഴാഴ്ച രാത്രി ഒന്‍പതരയോടെയാണ് സംഭവം. ഇവരുടെ മരുമകളും, രണ്ട് കുട്ടികളും ഈ സമയം വീട്ടിലുണ്ടായിരുന്നു.

യുവാവ് വീട്ടമ്മയെ ഇടിക്കുകയും ചവിട്ടുകയുമെല്ലാം ചെയ്‌തെന്ന് ബീവിയുടെ മകന്‍ പറയുന്നു. വീട്ടമ്മയെ ഉടനെ ഫോര്‍ട്ടുകൊച്ചി സര്‍ക്കാര്‍ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. 

അമരാവതി ബിവറേജസ് ഔട്ട്‌ലറ്റിന് സമീപമാണ് ബീവിയും കുടുംബവും വാടകയ്ക്ക് താമസിച്ചിരുന്നത്. ആക്രമണത്തില്‍ ഇവരുടെ മകന്‍ ഷമീറിനും പരിക്കേറ്റു. ഫോര്‍ട്ടുകൊച്ചി പൊലീസ് കേസെടുത്ത് അന്വേഷണം ആരംഭിച്ചു.