തൃശൂർ : തൃശൂർ ജില്ലയിൽ മൂന്നാഴ്ചയ്ക്കിടെ 9 കൊലപാതകങ്ങൾ നടന്ന സാഹചര്യത്തിൽ പൊലീസ് പരിശോധന ശക്തമാക്കി. ഓപ്പറേഷൻ റെയ്ഞ്ചർ എന്ന പേരിൽ നടത്തിയ റെയ്ഡിൽ നിരവധി ആയുധങ്ങൾ കണ്ടെടുത്തു. പാലക്കാട്, തൃശൂർ, മലപ്പുറം ജില്ലകളിലെ ​ഗുണ്ടാ താവളങ്ങളിലാണ് റെയ്ഡ് നടത്തിയത്. 

തൃശൂർ റെയ്ഞ്ച് ഡിഐജി എസ് സുരേന്ദ്രന്റെ നേതൃത്വത്തിലായിരുന്നു റെയ്ഡ്. നിരവധി ​ഗുണ്ടാസംഘാം​ഗങ്ങളുടെ വീടുകളിലും റെയ്ഡ് നടത്തി. കുന്നംകുളത്ത് ഒരു വീട്ടിൽ ​ഗുണ്ടകൾ വളർത്തിയിരുന്ന മരപ്പട്ടികളെ പൊലീസ് പിടിച്ചെടുത്തു. 

ഒല്ലൂരിൽ കോളനികളിലും റെയ്ഡ് നടത്തി. ബോംബ് സ്ക്വാഡും സ്ഥലത്തെത്തിയിരുന്നു. പാലക്കാട് ഷൊർണൂർ സബ് ഡിവിഷന് കീഴിലെ 61 ഇടങ്ങളിൽ പൊലീസ് റെയ്ഡ് നടത്തി. ഒറ്റപ്പാലം, മണ്ണാർക്കാട് എന്നിവിടങ്ങളിലും പൊലീസ് പരിശോധന നടത്തി.