തിരുവനന്തപുരം: വിഎസ് അച്ചുതാനന്ദൻ മുന്നിലിരിക്കെ സിപിഎം ജനറൽ സെക്രട്ടറി സീതാറാം യച്ചൂരി ചോദിച്ചു 'വിഎസിനെ നിങ്ങൾക്ക് തടയാൻ കഴിയുമോ'. ലോക്സഭാ തിരഞ്ഞെടുപ്പു പ്രചാരണത്തിനു വിഎസ് ഇറങ്ങുമോയെന്ന ചോദ്യത്തിനായിരുന്നു യച്ചൂരിയുടെ ഈ പ്രതികരണം. ജനങ്ങളും പാർട്ടിയും ആഗ്രഹിക്കുന്നിടത്തെല്ലാം വിഎസ് എത്തുമെന്നും യച്ചൂരി കൂട്ടിച്ചേർത്തപ്പോൾ വിഎസിന്റെ മുഖത്തും ചിരി വിടർന്നു.

ഇന്നലെ വൈകിട്ട് നാലരയോടെയാണു കവടിയാർ ഹൗസിൽ യച്ചൂരി എത്തിയത്. സ്റ്റുഡന്റ്സ് പാർലമെന്റിനെത്തിയ യച്ചൂരി വിഎസിനെ കാണാൻ സമയം കണ്ടെത്തുകയായിരുന്നു. 

ഡൽഹിയിലെ കാലാവസ്ഥ കണക്കിലെടുത്തു കഴിഞ്ഞ രണ്ടു കേന്ദ്ര കമ്മിറ്റി യോഗങ്ങൾക്കും വിഎസ് എത്തിയിരുന്നില്ല. അതുകൊണ്ട് ഇവിടെയെത്തിയപ്പോൾ അദ്ദേഹത്തെ വന്നു കണ്ടതാണെന്ന് യച്ചൂരി പറഞ്ഞു. ഇരുവരും ഒരു മണിക്കൂറോളം കൂട്ടിക്കാഴ്ച്ച നടത്തി.