തിരുവനന്തപുരം: തിരുവനന്തപുരം കോര്‍പ്പറേഷനിലേക്കുള്ള മേയര്‍ തെരഞ്ഞെടുപ്പ് നവംബര്‍ 12ന് നടക്കും. മുന്‍ മേയര്‍ വികെ പ്രശാന്ത് വട്ടിയൂര്‍ക്കാവില്‍ നിന്ന് നിയമസഭയിലേക്ക് വിജയിച്ച സാഹചര്യത്തിലാണ് തെരഞ്ഞെടുപ്പ് നടക്കുന്നത്.

തെരഞ്ഞെടുപ്പ് നടത്തുന്നതിനായുള്ള നിര്‍ദേശം സംസ്ഥാന തെരഞ്ഞെടുപ്പ് കമ്മീഷന്‍ വരണാധികാരിക്ക് നല്‍കി. തിരുവനന്തപുരം ജില്ലാ കലക്ടറാണ് വരണാധികാരി. വികെ പ്രശാന്തിന് പകരം ആരെന്നുള്ള ചര്‍ച്ചകള്‍ സിപിഎം ക്യാമ്പുകളില്‍ ചര്‍ച്ച സജീവമാക്കിയിട്ടുണ്ട്. സിപിഎമ്മിന്റെ യുവ നേതാവും കൗണ്‍സിലറുമായ ഐപി ബിനുവിന്റെത് ഉള്‍പ്പെടെ പേരുകള്‍ ഉയര്‍ന്നുകേള്‍ക്കുന്നുണ്ട്. നിലവില്‍ കോര്‍പ്പറേഷനില്‍ എല്‍ഡിഎഫ് 37, ബിജെപി 35, യുഡിഎഫ് 17 എന്നിങ്ങനെയാണ് കക്ഷിനില.