കൊച്ചി: ശബരിമല യുവതീ പ്രവേശനത്തിന് എതിരെ നടക്കുന്ന സമരം സുപ്രിം കോടതി വിധിക്കെതിരെയെന്ന് ഹൈക്കോടതി നിരീക്ഷണം. സമരവുമായി ബന്ധപ്പെട്ട് അറസ്റ്റിലായ തൃപ്പൂണിത്തുറ സ്വദേശി അഡ്വ. ഗോവിന്ദ് മധുസൂദന്റെ ജാമ്യഹര്‍ജി തള്ളിക്കൊണ്ടാണ് ഹൈക്കോടതി നിരീക്ഷണം.

ന്യായീകരിക്കാനാവാത്ത അക്രമ സംഭവങ്ങളാണ് പമ്പയിലും നിലയ്ക്കലുമുണ്ടായതെന്ന് കോടതി അഭിപ്രായപ്പെട്ടു. സുപ്രിം കോടതി വിധിക്ക് എതിരെയാണ് സമരം. പ്രതിക്കു ജാമ്യം നല്‍കിയാല്‍ അക്രമ സംഭവങ്ങള്‍ ആവര്‍ത്തിക്കപ്പെടുമെന്ന് കോടതി പറഞ്ഞു.

ശബരിമല അക്രമങ്ങളുമായി ബന്ധപ്പെട്ട് ഹൈക്കോടതിക്കു മുന്നില്‍ വന്ന ആദ്യ ജാമ്യാപേക്ഷയാണ് അഡ്വ. ഗോവിന്ദ് മധുസൂദനന്റേത്. താന്‍ അക്രമങ്ങളില്‍ പങ്കാളിയല്ലെന്നും നാമജപത്തില്‍ പങ്കെടുക്കുക മാത്രമാണ് ചെയ്തതെന്നുമാണ് ജാമ്യാപേക്ഷയില്‍ പറഞ്ഞിരുന്നത്. എന്നാല്‍ അന്വേഷണം പ്രാഥമിക ഘട്ടത്തില്‍ മാത്രമാണെന്നു ചൂണ്ടിക്കാട്ടി ഹര്‍ജി തള്ളുകയായിരുന്നു.