കൊച്ചി : ശബരിമലയില്‍ യുവതികള്‍ പ്രവേശിച്ചത് സര്‍ക്കാരിന്റെ അറിവോടെയാണെന്ന് സത്യവാങ്മൂലം. പമ്പയില്‍ നിന്നും സന്നിധാനത്തേക്കുള്ള യാത്രയില്‍ കനകദുര്‍ഗ്ഗയെയും ബിന്ദുവിനെയും മഫ്തിയില്‍ നാല് പൊലീസ് ഉദ്യോഗസ്ഥര്‍ അനുഗമിച്ചിരുന്നതായും പത്തനംതിട്ട എസ് പി സമര്‍പ്പിച്ച സത്യവാങ്മൂലത്തില്‍ പറയുന്നു.

യുവതികളുടെ സുരക്ഷാര്‍ത്ഥമാണ് മഫ്തിയില്‍ പൊലീസ് സഞ്ചരിച്ചതെന്നും പ്രതിഷേധം ഭയന്നാണ് വിഐപി ഗേറ്റിലൂടെ പ്രവേശിപ്പിച്ചതെന്നും വ്യക്തമാക്കിയിട്ടുണ്ട്. വ്യാപക പ്രതിഷേധമുണ്ടായേക്കുമെന്ന് റിപ്പോര്‍ട്ടുകള്‍ ഉണ്ടായിരുന്നത് കൊണ്ടാണ് ഈ മാര്‍ഗം സ്വീകരിച്ചത്. 

എന്നാല്‍ ഹൈക്കോടതി നിയോഗിച്ച നിരീക്ഷക സമിതിയോട് അനാദരവ് കാണിച്ചിട്ടില്ലെന്നും സന്നിധാനത്തെത്താതിരുന്നത് ഔദ്യോഗിക തിരക്കുകള്‍ കാരണമാണെന്നും എസ് പി സത്യവാങ് മൂലത്തില്‍ പറയുന്നു. തിരുവാഭരണഘോഷയാത്രയ്ക്ക് സുരക്ഷ ഒരുക്കാനുള്ള ചുമതല ഉണ്ടായിരുന്നു. ഇതാണ് നിരീക്ഷക സമിതിയെ നേരില്‍ കാണാതിരുന്നതിന് കാരണമെന്നും എസ് പി സമര്‍പ്പിച്ച റിപ്പോര്‍ട്ടില്‍ ബോധിപ്പിച്ചിട്ടുണ്ട്.