തൃശൂര്‍: മലങ്കര ഓര്‍ത്തഡോക്‌സ് സഭയെ തകര്‍ക്കാന്‍ വ്യക്തിയോ പ്രസ്ഥാനമോ സര്‍ക്കാരോ രാഷ്ട്രീയ പാര്‍ട്ടിയോ ശ്രമിച്ചാല്‍ അവ സ്വയം തകരുമെന്ന കാഴ്ചയാണു നാമിപ്പോള്‍ കണ്ടുകൊണ്ടിരിക്കുന്നതെന്ന് ബസേലിയോസ് മാര്‍ത്തോമ്മാ പൗലോസ് ദ്വിതീയന്‍ കാതോലിക്കാ ബാവാ പറഞ്ഞു. മലങ്കര ഓര്‍ത്തഡോക്‌സ് സുറിയാനി സഭയുടെ ക്രൈസ്തവ യുവജനപ്രസ്ഥാനത്തിന്റെ വടക്കന്‍മേഖലാ സംഗമം ഉദ്ഘാടനം ചെയ്യുകയായിരുന്നു അദ്ദേഹം.

സഭയോടു പോരടിക്കുകയെന്നാല്‍ ദൈവത്തോടു പോരടിക്കുകയെന്നാണ്. സഭയ്ക്കു നന്മചെയ്തത് പൂര്‍വികരായ ഹൈന്ദവ നാട്ടുരാജാക്കന്മാരാണ്. അല്ലാതെ വിദേശികളല്ല. സഭയെ കുറ്റപ്പെടുത്തുന്നവര്‍ അവരുടെ കുറ്റം മറച്ചുവയ്ക്കുകയാണ്. നീതിന്യായ കോടതി നമുക്ക് അനുകൂലമായി നല്‍കിയ വിധിയെ പലരും വെല്ലുവിളിക്കുകയാണ്. അതു നാശത്തിനാണ്. ധൈര്യമായി ദൈവത്തില്‍ ആശ്രയിക്കുക. സഭ തകരില്ലെന്നും അദ്ദേഹം പറഞ്ഞു.