പാൽമ : തീപിടിത്ത മുന്നറിയിപ്പ് അലാറം മുഴങ്ങിയതിനെത്തുടർന്ന് വിമാനത്തിൽ നിന്ന് പുറത്തേക്ക് ചാടിയ 18 യാത്രക്കാർക്ക് പരിക്കേറ്റു. സ്പെയിനിലെ പാൽമ ഡി മല്ലോറ എയർപോർട്ടിലാണ് സംഭവം. മാഞ്ചസ്റ്ററിലേക്ക് പോകാൻ റൺവേയിൽ നിർത്തിയിട്ട റയൻഎയർ 737 എന്ന വിമാനം ടേക്ക് ഓഫ് ചെയ്യുന്നതിന് തൊട്ടു മുൻപാണ് സംഭവമുണ്ടായത്.

വിമാനത്തിൽ നിന്ന് അപായ അലാറം മുഴങ്ങിയതിനെത്തുടർന്ന് ജീവനക്കാർ യാത്രക്കാരെ വിമാനത്തിൽ നിന്ന് പുറത്തിറക്കാനുള്ള നടപടികൾ തുടങ്ങി. പരിഭ്രാന്തരായ യാത്രക്കാർ എമർജൻസി എക്സിറ്റ് തുറന്ന ഉടൻ വിമാനത്തിന്റെ ചിറകിലേക്ക് കയറുകയും അവിടെ നിന്നും താഴേക്ക് ചാടുകയാണ് ചെയ്തത്.വളരെ ഉയരത്തിൽ നിന്നും താഴെക്ക് വീണതോടെയാണ് പലർക്കും പരിക്കേറ്റത്.

തീപിടിത്ത മുന്നറിയിപ്പ് സൂചിപ്പിക്കുന്ന ലൈറ്റ് തെളിഞ്ഞതോടെ എയർപോർട്ടിലെ എമർജൻസി ടീം വിമാനത്തിനടുത്തെത്തി യാത്രക്കാരെ രക്ഷപെടുത്താൻ ശ്രമം ആരംഭിച്ചിരുന്നു. എന്നാൽ ഇവർ എത്തും മുൻപ് യാത്രക്കാർ പുറത്തേക്ക് ചാടുകയായിരുന്നു.

പതിനെട്ട് പേർക്ക് പരിക്കേറ്റതായും, അവരിൽ ആറ് പേരെ ആശുപത്രിയിലേക്ക് കൊണ്ടുപോയതായും അധികൃതർ വ്യക്തമാക്കി. ആരുടെയും പരിക്ക് ഗുരുതരമല്ല അപായ അലാറം മുഴങ്ങിയ ഉടൻ തന്നെ എമർജൻസി ടീം പ്രവർത്തനം ആരംഭിച്ചതായും എയർ പോർട്ട് അധികൃതർ പറഞ്ഞു.സംഭവത്തിന്റെ ദൃശ്യങ്ങൾ പുറത്ത് വന്നിട്ടുണ്ട്.

അതേ സമയം തെറ്റായ ഫയർ അലാറം ആയിരുന്നു അതെന്നും യാത്രക്കാരെ സുരക്ഷിതമായി ടെർമിനലിലെത്തിച്ചെന്നും റയൻ എയർ പ്രസ്താവനയിൽ അറിയിച്ചു. യാത്രക്കാരെ ഒഴിപ്പിച്ചതിന് പിന്നാലെ അവർക്ക് ആവശ്യമായ വൈദ്യസഹായവും നൽകി. യാത്രക്കാർക്കുണ്ടായ അസൗകര്യത്തിൽ എയർലൈൻ ഖേദം പ്രകടിപ്പിച്ചു. സംഭവത്തിൽ എയർപോർട്ട് സുരക്ഷ ഉദ്യോഗസ്ഥരും അഗ്നിശമന സേന ഉദ്യോഗസ്ഥരും അന്വേഷണം ആരംഭിച്ചിട്ടുണ്ട്.