ടോക്യോ: ന്യൂസിലന്‍ഡില്‍ നിന്ന് ചൈനയിലേക്ക് പുറപ്പെട്ട ജാപ്പനീസ് ചരക്കുകപ്പല്‍ അപകടത്തില്‍പ്പെട്ടു. 43 ജീവനക്കാരും ആറായിരത്തോളം കന്നുകാലികളുമാണ് കപ്പലില്‍ ഉണ്ടായിരുന്നത്. 

ബുധനാഴ്ച രാത്രിയോടെ ശക്തമായ കാറ്റിനെത്തുടര്‍ന്ന് തെക്കന്‍ ചൈനക്കടലില്‍ വെച്ച് കപ്പലിന്റെ എന്‍ജിന്‍ തകരാറിലായി. ഇതോടെ കടല്‍ക്ഷോഭത്തില്‍ പെട്ട്  കപ്പല്‍ മുങ്ങുകയുമായിരുന്നു. ഒരു ജീവനക്കാരനെ മാത്രമേ ജാപ്പനീസ് തീരസേനയ്ക്ക് രക്ഷപ്പെടുത്താന്‍ സാധിച്ചിട്ടുള്ളൂ. ഫിലിപ്പീന്‍സ് സ്വദേശിയായ സെറെനോ എഡ്വാറൊഡോ(45) ആണ് രക്ഷപ്പെട്ടത്.

മേസാക് ചുഴലിക്കാറ്റിനെത്തുടര്‍ന്നുണ്ടായ ശക്തമായ കാറ്റും കടല്‍ക്ഷോഭവുമാണ് അപകടത്തിന് കാരണമായത്. എന്‍ജിന്‍ തകരാറിലായതോടെ ലൈഫ് ജാക്കറ്റ് ധരിക്കാന്‍ എല്ലാവര്‍ക്കും നിര്‍ദേശം ലഭിച്ചിരുന്നു. എന്നാല്‍, വെള്ളത്തില്‍ ചാടിയശേഷം ആരെയും കണ്ടില്ലെന്ന് സെറെനോ പറഞ്ഞു. 
രക്ഷാപ്രവര്‍ത്തനം തുടരുകയാണ്. 

മൂന്നു കപ്പലുകളും അഞ്ച് വിമാനങ്ങളും നീന്തല്‍വിദഗ്ധരും രക്ഷാപ്രവര്‍ത്തത്തിന്റെ ഭാഗമാവുന്നു. കപ്പലിലുണ്ടായിരുന്ന 39 ജീവനക്കാരും ഫിലിപ്പീന്‍സില്‍നിന്നുള്ളവരാണ്. ന്യൂസീലന്‍ഡ്, ഓസ്‌ട്രേലിയ എന്നിവിടങ്ങളില്‍നിന്നാണ് ബാക്കിയുള്ളവര്‍.