ധാക്ക: ബംഗ്ലാദേശില്‍ കപ്പല്‍ ഇടിച്ച് യാത്രാബോട്ട് മുങ്ങി. ആറിലധികം പേര്‍ അപകടത്തില്‍ മരിച്ചതായും നൂറിലധികം ആളുകളെ കാണാതായതായും റിപ്പോര്‍ട്ടുകളുണ്ട്.

ഞായറാഴ്ച ധാക്കയ്ക്ക് സമീപം ശീതലക്ഷ്യ നദിയിലാണ് സംഭവം. എം വി രൂപോഷി- 9 ചരക്കുകപ്പലാണ് യാത്രാ ബോട്ടായ എം വി അഫ്‌സറുദ്ദീനില്‍ ഇടിച്ചത്. 

ഇടിച്ചശേഷവും യാത്രാബോട്ടിനെ വലിച്ചിഴച്ച് ചരക്കുകപ്പല്‍ നീങ്ങുന്ന വീഡിയോ പുറത്തുവന്നിട്ടുണ്ട്. കുറച്ചുദൂരം പോയ ശേഷം യാത്രാബോട്ട് മുങ്ങുകയായിരുന്നു. അപകടം നടന്ന് ഉടന്‍ തന്നെ യാത്രാബോട്ടില്‍ നിന്ന് യാത്രക്കാര്‍ നദിയിലേക്ക് ചാടുന്നതും വീഡിയോയില്‍ വ്യക്തമാണ്.

ബോട്ട് വെള്ളത്തില്‍ മുങ്ങിയ ശേഷമാണ് കപ്പല്‍ നിര്‍ത്തിയത്. യാത്രാ ബോട്ടുമായി കൂട്ടിയിടിക്കുന്ന സമയത്ത് തൊട്ടരികിലുള്ള ബോട്ടുകളിലെ ആളുകള്‍ ഒച്ചവെച്ച് അധികൃതര്‍ക്ക് മുന്നറിയിപ്പ് നല്‍കാന്‍ ശ്രമിക്കുന്നതും വീഡിയോയില്‍ വ്യക്തമാണ്.