സര്‍ക്കസ് കൂടാരങ്ങള്‍ ചിലപ്പോള്‍ അപകടങ്ങള്‍ക്കും വേദിയാകാറുണ്ട്. മൃഗങ്ങള്‍ പരിശീലകരെ ആക്രമിക്കുന്ന സംഭവങ്ങള്‍ ലോകത്തിന്റെ പലയിടങ്ങളിലും റിപ്പോര്‍ട്ട് ചെയ്യപ്പെട്ടിട്ടുണ്ട്. അത്തരമൊരു ദൃശ്യമാണ് ഇപ്പോള്‍ റഷ്യയില്‍ നിന്നും പുറത്തുവരുന്നത്. 

സര്‍ക്കസിനിടയില്‍ കാണികളുടെ മുന്നില്‍വച്ച് ഗര്‍ഭിണിയായ പരിശീലകയെ കരടി ആക്രമിക്കുന്ന ദൃശ്യമാണിത്. കുട്ടികളടക്കമുള്ള കാണികള്‍ നോക്കിനില്‍ക്കെയായായിരുന്നു കരടിയുടെ ആക്രമണം.റഷ്യയിലെ ഒര്‍യോള്‍ എന്ന സ്ഥലത്തെ സര്‍ക്കസ് കൂടാരത്തിലാണ് നടുക്കുന്ന സംഭവം നടന്നത്. 

അപ്രതീക്ഷിതമായി കരടി സ്ത്രീയെ കടിക്കുകയും മാന്തുകയുമായിരുന്നു. തലനാരിഴയ്ക്കാണ്  ഇവര്‍ കരടിയുടെ ആക്രമണത്തില്‍ നിന്ന് രക്ഷപ്പെട്ടത്. ബ്രൗണ്‍ ബെയര്‍ വിഭാഗത്തില്‍പ്പെട്ട കരടിയാണ് പരിശീലകയെ ആക്രമിച്ചത്. ഗര്‍ഭസ്ഥ ശിശുവിനും യുവതിക്കും അപകടമൊന്നുമില്ലെന്ന് ആശുപത്രി വൃത്തങ്ങള്‍ സൂചിപ്പിച്ചു.