പടക്കം പൊട്ടിക്കുന്നതിന്റെ ശബ്ദം കേട്ട് മൃഗങ്ങള്‍ വരെ വിരണ്ടോടാറുണ്ട്. അത്തരത്തില്‍ ഭയന്നുപോയ വളര്‍ത്തുനായ നേരിട്ട കഷ്ടപ്പാടുകളാണ് ഇപ്പോള്‍ സോഷ്യല്‍മീഡിയയില്‍ വൈറലാകുന്നത്.

ചൈനയിലാണ് സംഭവം. പടക്കം പൊട്ടിക്കുന്നതിന്റെ ശബ്ദം കേട്ട് ഭയന്ന് ഒളിക്കാന്‍ ശ്രമിച്ച വളര്‍ത്തുനായയാണ് മണിക്കൂറുകളോളം കുടുങ്ങിപ്പോയത്. വീടിന്റെ ഭിത്തിയിലാണ് നായ കുടുങ്ങിയത്. ഇതെങ്ങനെ സംഭവിച്ചു എന്ന കാര്യം വ്യക്തമല്ല. എന്നാല്‍ ചുറ്റിക ഉപയോഗിച്ച് ഭിത്തി ഇടിച്ചുപൊട്ടിച്ചാണ് നായയെ രക്ഷിച്ചത്. ഇതിന്റെ ദൃശ്യങ്ങളാണ് വൈറലാകുന്നത്.

ഭിത്തിയില്‍ കുടുങ്ങിക്കിടക്കുന്ന നായയെ അയല്‍വാസികളാണ് കണ്ടത്. ഉടന്‍ തന്നെ വിവരം പൊലീസിനെ അറിയിക്കുകയായിരുന്നു. യാതൊരുവിധ പരിക്കുകളുമില്ലാതെയാണ് നായയെ പുറത്തെടുത്തത്. ചുറ്റിക കൊണ്ട് ഭിത്തി ഇടിച്ചുപൊട്ടിക്കുന്നതിനിടെ, നായ തല പുറത്തേയ്ക്ക് ഇടുന്നത് വീഡിയോയില്‍ വ്യക്തമാണ്. ഫെബ്രുവരി 13ന് ലൂണാര്‍ ന്യൂ ഇയര്‍ ആഘോഷിക്കുന്നതിനിടെയാണ് സംഭവം നടന്നത്.