റിയാദ്: സൗദിയിൽ മിനി ബസ് അപകടത്തിൽപ്പട്ട് രണ്ട് മലയാളി നഴ്സുമാർ മരിച്ചു. സൗദിയിലെ തായിഫിനടത്താണ് അപകടമുണ്ടായത്. വൈക്കം വഞ്ചിയൂർ സ്വദേശിനി അഖില (29) കൊല്ലം ആയൂർ സ്വദേശിനി സുബി (33) എന്നീ മലയാളി നഴ്സുമാരാണ് മരിച്ചത്. ഇവർക്കൊപ്പം അപകടത്തിൽപ്പെട്ട രണ്ട് മലയാളി നഴ്സുമാർ പരിക്കേറ്റ് ചികിത്സയിലാണ്. 

റിയാദിൽ നിന്ന് ജിദ്ദയിലേക്ക് വരുന്ന വഴിക്ക് തായിഫിനടത്തു വച്ച്  ഇവർ സഞ്ചരിച്ച മിനി ബസ് അപകടത്തിൽപ്പെടുകയായിരുന്നു. താഴ്ചയിലേക്ക് വാൻ മറിയുകയായിരുന്നു. റിയാദിൽ ക്വാറന്റൈൻ പൂർത്തിയാക്കി ജോലി സ്ഥലമായ ജിദ്ദയിലെ താമസ സ്ഥലത്തേക്കുള്ള യാത്രയിലാണ് അപകടമുണ്ടായത്.

അപകടത്തിൽപ്പെട്ട മറ്റ് രണ്ട് നഴ്സുമാരായ ആൻസി, പ്രിയങ്ക എന്നിവർ തായിഫ് കിങ് ഫൈസൽ ആശുപത്രിയിലാണ് ചികിത്സയിലുള്ളത്. ഞായറാഴ്ച രാവിലെ നാലര മണിയോടടുത്താണ് അപകടം ഉണ്ടായത്. ഡ്രൈവർ ഉറങ്ങിപ്പോയതാണ് അപകട കാരണമെന്നാണ് റിപ്പോർട്ടുകൾ.