ഹനോയ്: കോവിഡ് പ്രതിരോധത്തിൽ പുതിയ വെല്ലുവിളിയായി വീണ്ടും വൈറസിന് ജനിതകമാറ്റം. അതിവ്യാപന ശേഷിയുള്ള വൈറസിന്റെ വകഭേദത്തെ വിയറ്റ്‌നാമിലാണ് കണ്ടെത്തിയത്. ഇന്ത്യയിലും യുകെയിലുമുള്ള വൈറസ് വകഭേദങ്ങളുടെ സംയുക്തമായ കൊറോണ വൈറസ് ആണ് ഇതെന്ന് ​ഗവേഷകർ പറയുന്നു.

മറ്റ് വകഭേദങ്ങളെക്കാൾ കൂടുതൽ വേഗത്തിൽ പടരുന്നതാണ് പുതിയ വൈറസിന്റെ രീതി. വിയറ്റ്നാം ആരോഗ്യമന്ത്രി പുതിയ വകഭേദം കണ്ടെത്തിയ കാര്യം സ്ഥിരീകരിച്ചു. കോവിഡ് ബാധിതരായവരിൽ നടത്തിയ പരിശോധനയിലാണ് പുതിയ വകഭേദം പടരുന്നത് കണ്ടെത്തിയത്. 

വിയറ്റ്നാമിലെ 63 മുൻസിപ്പാലിറ്റികളും പ്രവിശ്യകളും ഉള്ളതിൽ 30 ഇടത്തേക്കും ഈ വകഭേദം വ്യാപിച്ചു. മെയ് മാസത്തിന്റെ തുടക്കത്തിൽ കോവിഡ് കേസുകൾ പിടിച്ചുനിർത്തിയെന്ന് ആശ്വസിച്ചിരിക്കെയാണ് രാജ്യത്ത് പെട്ടെന്ന് കോവിഡ് കേസുകൾ ഉയർന്നത്. 6856 പേർക്കാണ് ഇതുവരെ വിയറ്റ്നാമിൽ കോവിഡ് ബാധിച്ചത്. ഇതുവരെ ഇവിടെ  47 പേർ മരിച്ചു. വിയറ്റ്നാമിൽ വാക്സീനേഷനും പുരോഗമിക്കുകയാണ്