ലണ്ടൻ: ബ്രിട്ടിഷ് രാജകുമാരൻ ഹാരിക്കും ഭാര്യ മേഗന്‍ മാർക്കിളിനും രണ്ടാമത്തെ കുഞ്ഞു പിറന്നു. ‘ലിലിബെറ്റ് ഡയാന മൗണ്ട്ബാറ്റൺ–വിൻസർ എന്നാണു കുഞ്ഞിനു പേരിട്ടത്. മുത്തശ്ശി എലിസബത്ത് രാജ്ഞിയുടെയും ഹാരിയുടെ അമ്മ ഡയാന രാജകുമാരിയുടെയും പേരിന്റെ ഓർമയിലാണ് ഇരുവരും മകൾക്ക് ഈ പേര് നൽകിയത്. എലിസബത്ത് രാജ്ഞിയെ കുടുംബത്തിലെ ഏറ്റവും അടുപ്പമുള്ളവർ വിളിക്കുന്ന പേരാണ് ലിലിബെറ്റ്. ലിലി എന്നാണ് ഓമനപ്പേര്. 

വെള്ളിയാഴ്ച രാവിലെ പ്രാദേശികസമയം 11.40നായിരുന്നു കാലിഫോർണിയയിലെ സാന്റ ബാർബറ കോട്ടേജ് ആശുപത്രിയിലായിരുന്നു ലിലിയുടെ ജനനം. ഹാരി–മേഗൻ ദമ്പതിമാരുടെ പ്രസ് സെക്രട്ടറിയാണ് സന്തോഷ വാർത്ത പുറത്തുവിട്ടത്. 

2018 മേയ് 19നാണ് ഹാരിയും മേ​ഗനും വിവാഹിതരായത്. രണ്ടുവയസ്സുകാരൻ ആർച്ചിയാണ് ഇവരുടെ ആദ്യകുഞ്ഞ്. ബ്രിട്ടീഷ് രാജകുടുംബവുമായുള്ള ബന്ധം അവസാനിപ്പിച്ച ഇവർ കഴിഞ്ഞ വർഷം മാർച്ചിലാണ് യുഎസിലേക്ക് താമസം മാറിയത്. ഇതിനുശേഷം രാജകുടുംബത്തിൽനിന്നു നേരിട്ട അവഗണനയും വിവേചനവും തുറന്നു പറഞ്ഞ മേഗന്റെ അഭിമുഖം ഏറെ വിവാദമായിരുന്നു.