സ്റ്റോക്ക്‌ഹോം: യൂറോപ്യന്‍ യൂണിയന്റെ യോഗത്തിന് തന്റെ മൂന്ന് മാസം മാത്രം പ്രായമുള്ള കുഞ്ഞുമായെത്തി സ്വീഡന്റെ കാലാവസ്ഥാ മന്ത്രി റൊമിനാ പൗര്‍മോഖ്താരി. കാലാവസ്ഥാ വ്യതിയാന നയങ്ങളെ കുറിച്ച് ചര്‍ച്ച ചെയ്യാനായി വ്യാഴാഴ്ച ചേര്‍ന്ന ഒരുദിവസം നീണ്ട യോഗത്തിലാണ് റൊമിന മകന്‍ ആദവുമായി എത്തിയത്. യൂറോപ്യന്‍ യൂണിയന്റെ ചരിത്രത്തില്‍ ആദ്യമായാണ് ഇത്തരത്തില്‍ ഒരംഗം കുഞ്ഞുമായി എത്തുന്നതെന്ന് യൂറോപ്യന്‍ യൂണിയന്‍ കൗണ്‍സില്‍ ഉദ്യോഗസ്ഥന്‍ പറഞ്ഞു. ലക്സംബര്‍ഗിലാണ് യോഗം നടന്നത്.

2022ല്‍ അധികാരമേറ്റ സമയം സ്വീഡന്റെ ചരിത്രത്തിലെ ഏറ്റവും പ്രായം കുറഞ്ഞ മന്ത്രിയെന്ന റെക്കോഡ് 30-കാരിയായ റൊമിന സ്വന്തമാക്കിയിരുന്നു. അതിന് ശേഷം യൂറോപ്യന്‍ യൂണിയന്‍ യോഗത്തില്‍ കുഞ്ഞുമായെത്തി വീണ്ടും ചരിത്രം സൃഷ്ടിച്ചിരിക്കുകയാണ് മന്ത്രി. ഇടയ്ക്ക് ഒരുതവണ ഒന്ന് കരഞ്ഞത് ഒഴിച്ചാല്‍ ബാക്കി സമയം മുഴുവന്‍ പരിപൂര്‍ണമായി ആദം യോഗത്തോട് സഹകരിച്ചു.

റൊമിന യോഗത്തില്‍ സംസാരിക്കവെയാണ് കുഞ്ഞ് ആദം കരഞ്ഞത്. ഉടന്‍ അവനെ ആശ്വസിപ്പിച്ചുകൊണ്ട്, 'നല്ല ടൈമിങ്, ആദം' എന്ന് അമ്മ റൊമിന പറഞ്ഞുകൊണ്ട് പ്രസംഗം തുടര്‍ന്നു. പ്രസവാവധി കഴിഞ്ഞ് വീണ്ടും ഓഫീസിലെത്തിയ ഉടന്‍ തന്നെയാണ് റൊമിന യോഗത്തിനെത്തിയത്. അതേസമയം റൊമിനയുടെ ഭര്‍ത്താവ് സ്വീഡനില്‍ തെരഞ്ഞെടുപ്പ് നടക്കുന്ന സെപ്റ്റംബര്‍ വരെ അവധിയിലാണ്. ഭര്‍ത്താവും റൊമിനയ്ക്കൊപ്പം ലക്സംബര്‍ഗിലെത്തിയിരുന്നു.

ജോലിയും മാതൃത്വവും ഒന്നിച്ച് വരുമ്പോള്‍ അതില്‍ ഒന്നിനെ മാത്രമായി തെരഞ്ഞെടുക്കേണ്ടതില്ല എന്നതിന് മാതൃക കാണിക്കുകയായിരുന്നു എന്റെ ഉദ്ദേശം. എന്നാല്‍ അതിന് ദിനോസറിന്റെ കാലത്തെ ചിന്താഗതികളുമായി നടക്കാത്ത ഒരു ജീവിതപങ്കാളി കൂടെ വേണം. പുരോഗമനപരമായി ചിന്തിക്കുന്നതും ഒപ്പം നിന്ന് ഉത്തരവാദിത്തം പങ്കിടാന്‍ തയ്യാറുള്ളതുമായ ഒരാള്‍.' കുഞ്ഞിനെ യോഗത്തിന് കൊണ്ടുവന്നതിനെ കുറിച്ച് റൊമിന പറഞ്ഞു. ഒരു രാഷ്ട്രീയയോഗത്തില്‍ കുഞ്ഞിനെ കൊണ്ടുവന്നുവെന്നതുകൊണ്ട് ഒരു പ്രശ്നവുമില്ലെന്ന് പറഞ്ഞുകൊണ്ട് പോളണ്ടിന്റെ ഡെപ്യൂട്ടി കാലാവസ്ഥാ മന്ത്രി റൊമിനയെ പിന്തുണയ്ക്കുകയും ചെയ്തു.