കാബൂള്‍: അഫ്ഗാനിസ്ഥാനില്‍ ഷിയാ പള്ളിയിലുണ്ടായ ചാവേര്‍ ആക്രമണത്തില്‍ 29 പേര്‍ മരിച്ചു. 80ലധികം പേര്‍ക്ക് പരുക്കേറ്റു. കിഴക്കന്‍ പക്തിയ പ്രവിശ്യയുടെ തലസ്ഥാനമായ ഗാര്‍ഡസ് നഗരത്തിലെ പള്ളിയിലാണ് സ്‌ഫോടനമുണ്ടായത്. വെള്ളിയാഴ്ച പ്രാര്‍ഥനയ്ക്കായി ആളുകള്‍ കൂടിയിരുന്ന സമയത്ത് മുഖം മഴുവന്‍ മറച്ചെത്തിയ രണ്ട് ചാവേറുകളാണ് പള്ളിയില്‍ വച്ച് പൊട്ടിത്തെറിച്ചത്. പകല്‍ 1.30നായിരുന്നു ആക്രമണം. സ്‌ഫോടനത്തിന്റെ ഉത്തരവാദിത്വം താലിബാനടക്കമുള്ള ഒരു ഭീകര സംഘടനയും ഏറ്റെടുത്തിട്ടില്ല. 

രണ്ട് സ്‌ഫോടനങ്ങളാണ് നടന്നതെന്ന് പൊലീസ് നടത്തിയ പ്രാഥമികാന്വേഷണത്തില്‍ വ്യക്തമായി. പരുക്കേറ്റ പലരുടെയും നില ഗുരുതരമാണ്. മരണസംഖ്യ ഉയരാനിടയുണ്ടെന്ന് വാര്‍ത്താ ഏജന്‍സികള്‍ റിപ്പോര്‍ട്ട് ചെയ്തു. പ്രദേശത്ത് സുരക്ഷ ശക്തമാക്കി.

കഴിഞ്ഞ ദിവസം ജലാലാബാദിലും പടിഞ്ഞാറന്‍ പ്രവശ്യയായ ഫറാഹിലും ഐ.എസ് തീവ്രവാദികള്‍ നടത്തിയ ആക്രമണത്തില്‍ യഥാക്രമം 22ഉം 11ഉം ആളുകള്‍ കൊല്ലപ്പെട്ടിരുന്നു. അഫ്ഗാനിസ്ഥാനില്‍ ഈ വര്‍ഷം ഇതുവരെയായി 1,700 സാധാരണക്കാര്‍ വിവിധ സ്‌ഫോടനങ്ങളിലും ആക്രമണങ്ങളിലും കൊല്ലപ്പെട്ടതായി യു.എന്‍ പുറത്തുവിട്ട കണക്കുകളില്‍ വ്യക്തമാക്കി. 2009ന് ശേഷം ആദ്യമായാണ് ഇത്രയധികം മരണങ്ങള്‍ റിപ്പോര്‍ട്ട് ചെയ്യുന്നത്.