ഇസ്ലാമാബാദ്: ടെലിവിഷന്‍ ചാനല്‍ ചര്‍ച്ചകള്‍ക്കിടെ അവതാരകര്‍ അഭിപ്രായ പ്രകടനം നടത്തുന്നതിനു പാകിസ്ഥാനില്‍ വിലക്ക്. അവതാരകര്‍ 'മോഡറേറ്റര്‍മാര്‍' മാത്രമാണെന്നും സ്വന്തം അഭിപ്രായം വിദഗ്ധാഭിപ്രായമായി അവര്‍ അവതരിപ്പിക്കേണ്ടതില്ലെന്നും പാകിസ്ഥാന്‍ ഇലക്ട്രോണിക് മീഡിയ റെഗുലേറ്ററി അതോറിറ്റി നിര്‍ദേശിച്ചു. പാക് പത്രമായ ഡോണ്‍ ആണ് ഇത് റിപ്പോര്‍ട്ട് ചെയ്തത്.

വസ്തുനിഷ്ഠമായും പക്ഷപാതമില്ലാതെയും ചര്‍ച്ചകള്‍ മോഡറേറ്റു ചെയ്യുക എന്നതു മാത്രമാണ് അവതാരകരുടെ ചുമതലയെന്ന് അതോറിറ്റി പുറത്തിറക്കിയ പെരുമാറ്റ ചട്ടത്തില്‍ പറയുന്നു. അവതാരകരുടെ രാഷ്ട്രീയാഭിപ്രായങ്ങളോ പക്ഷപാതമോ വിധിപ്രസ്താവമോ ചര്‍ച്ചയ്ക്കിടെ വേണ്ട. വിദഗ്ധര്‍ എന്ന മട്ടില്‍ അവതാരകള്‍ ചര്‍ച്ചയില്‍ കാര്യങ്ങള്‍ അവതരിപ്പിക്കരുതെന്ന് അതോറിറ്റി പറയുന്നു.

ചര്‍ച്ചകളില്‍ അതിഥികളെ തെരഞ്ഞെടുക്കുമ്പോള്‍ അതീവ ശ്രദ്ധ പുലര്‍ത്തണമെന്നും നിര്‍ദേശമുണ്ട്. ഓരോ വിഷയത്തിലും അതിഥികളുടെ അറിവും വൈദഗ്ധ്യവും പരിഗണിച്ചു വേണം തെരഞ്ഞെടുപ്പു നടത്തണമെന്ന് ടെലിവിഷന്‍ ചാനലുകള്‍ക്ക് അയച്ചുകൊടുത്ത ഉത്തരവില്‍ നിര്‍ദേശിച്ചിട്ടുണ്ട്.

ഇസ്ലാമാബാദ് ഹൈക്കോടതിയുടെ വിധിയുടെ പശ്ചാത്തലത്തിലാണ് പാക് റെഗുലേറ്ററി അതോറിറ്റി ചാനലുകള്‍ക്കായി മാര്‍ഗരേഖ പുറത്തിറക്കിയിരിക്കുന്നത്. ചാനല്‍ ചര്‍ച്ചകളില്‍ ജുഡീഷ്യറിയെ അപമാനിക്കും വിധം പരാമര്‍ശങ്ങള്‍ നടക്കുന്നതായും അവതാരകര്‍ അതിരുവിട്ട് അഭിപ്രായ പ്രകടനങ്ങള്‍ നടത്തുന്നതായും ഹൈക്കോടതി കുറ്റപ്പെടുത്തിയിരുന്നു. ഇക്കാര്യത്തില്‍ അതോറിറ്റി എന്തു നടപടിയെടുത്തു എന്ന് അറിയിക്കാന്‍ കോടതി നിര്‍ദേശിക്കുകയും ചെയ്തിരുന്നു.