മസ്കറ്റ്: ഒമാനില്‍ ചെറിയ പെരുന്നാള്‍ ഇന്ന് ആഘോഷിക്കും.  റമദാൻ 29 പൂർത്തിയായ ശനിയാഴ്ച മാസപിറവി കണ്ടതിന്‍റെ അടിസ്ഥാനത്തിൽ ശവ്വാൽ ഒന്ന് ഞായറാഴ്ച ആയിരിക്കുമെന്ന് ഒൗഖാഫ് മതകാര്യ മന്ത്രാലയം അറിയിച്ചു. കോവിഡിന്‍റെ പശ്ചാത്തലത്തില്‍ ആഘോഷങ്ങൾക്ക്  ഒമാൻ സുപ്രീം കമ്മറ്റി കർശന  നിയന്ത്രണം ഏര്‍പ്പെടുത്തിയിട്ടുണ്ട്.

പെരുന്നാൾ നമസ്കാരവും , ആഘോഷവും  ഒത്തുചേരലുകളുമില്ലാത്ത ചെറിയ പെരുനാളിനാണ്  ഒമാനിലെ  വിശ്വാസികൾ സാക്ഷ്യം വഹിക്കുന്നത്. ചെറിയ പെരുന്നാള്‍ പ്രമാണിച്ച് രാജ്യത്ത് മൂന്നു ദിവസം പൊതു അവധി പ്രഖ്യാപിച്ചിട്ടുണ്ട്. സർക്കാർ, സ്വകാര്യ   സ്ഥാപനങ്ങൾക്കാണ് മൂന്നു  ദിവസത്തെ പൊതു ഒഴിവാണ്  നൽകിയിരിക്കുന്നത്. അവധിക്കു   ശേഷം  ബുധനാഴ്ച മുതൽ  സർക്കാർ  സ്വകാര്യ  സ്ഥാപനങ്ങൾ  പ്രവർത്തിച്ചു തുടങ്ങും.

കോവിഡ് വൈറസ് ബാധ വ്യാപനം രാജ്യത്ത്  ഉയരുന്നതുമൂലം  പ്രതിരോധ നടപടികളുടെ ഭാഗമായിട്ടാണ്  ചെറിയ പെരുന്നാളിന്  കർശന നിയന്ത്രണം സുപ്രിം കമ്മറ്റി നിർദ്ദേശിച്ചിരിക്കുന്നത്. പെരുന്നാൾ പ്രമാണിച്ച് 301 വിദേശികൾക്കുൾപ്പെടെ 797  തടവുകാർക്ക് മോചനവും ഒമാന്‍ ഭരണാധികാരി സുൽത്താൻ ഹൈതം ബിൻ താരിഖ് അൽ സൈദ് പ്രഖ്യാപിച്ചിട്ടുണ്ട്.