ബെയ്ജിങ്: കോവിഡിന് കാരണമായ സാർസ് കോവ്-2 വൈറസിനെ തടയുന്ന ആന്റി ബോഡികൾ തിരിച്ചറിഞ്ഞതായി ഗവേഷകർ. കോവിഡ് 19 ഭേദമായ ആളുടെ രക്തത്തിൽ നിന്ന് ചൈനീസ് ഗവേഷകരാണ് ആന്റി ബോഡികൾ വേർതിരിച്ചത്. 

ബി38, എച്ച്4 എന്നിങ്ങനെയാണ് ഇവയ്ക്ക് ഗവേഷകർ പേരിട്ടിരിക്കുന്നത്. ചൈനീസ് അക്കാഡമി ഓഫ് സയൻസിലെ ഗവേഷരാണ് പഠനത്തിന് പിന്നിൽ. 

ഈ ആന്റി ബോഡികൾ കോവിഡ് രോഗികളുടെ ചികിത്സക്കായി ഉപയോഗിക്കാൻ സാധിക്കുമെന്ന്  ​ഗവേഷകർ അവകാശപ്പെട്ടു. കോവിഡ് ചികിത്സക്കുപയോഗിക്കാനുള്ള ലഘുവായ തന്മാത്രാ ഘടനയുള്ള ആന്റി വൈറൽ മരുന്ന് വികസിപ്പിക്കാനുള്ള ശ്രമങ്ങൾക്ക് ഈ കണ്ടുപിടുത്തം പ്രയോജനം ചെയ്യുമെന്നാണ് പ്രതീക്ഷിക്കുന്നത്. 

ഈ രണ്ട് ആന്റി ബോഡികളുടെ ഒന്നിച്ചുള്ള പ്രവർത്തനം വൈറസിന്റെ സ്‌പൈക്ക് പ്രോട്ടീന്റെ പ്രവർത്തനത്തെ തടസപ്പെടുത്തുന്നുവെന്നാണ് ഗവേഷകർ പറയുന്നത്. ഇതുമൂലം വൈറസിന് കോശങ്ങൾക്കുള്ളിലേക്ക് കടന്നു കയറാൻ സാധിക്കാതെ വരുന്നുവെന്നും ഗവേഷകർ വ്യക്തമാക്കി.