ക്രിസ്മസ് സമ്മാനമായി കിട്ടിയ എയർപോഡ് കളിക്കുന്നതിനിടെ ഏഴുവയസുകാരൻ വിഴുങ്ങി. ജോർജിയ സ്വദേശിയായ കിയാരയുടെ മകനാണ് എയർപോഡ് വിഴുങ്ങിയത്. എയർപോഡ് വിഴുങ്ങിയ ശേഷമുള്ള മകന്റെ എക്സറേ പങ്കുവച്ചുകൊണ്ട് കിയാര തന്നെയാണ് ഇക്കാര്യം പങ്കുവച്ചത്. 

ഡിസംബർ 29-ാം തിയതി ജോലിക്കിടെയാണ് തനിക്കൊരു എമർജൻസി ഫോൺ കോൾ വന്നതെന്നും വിവരമറിഞ്ഞ് ഹോസ്പിറ്റലിലേക്ക് താൻ പാഞ്ഞെത്തുകയായിരുന്നെന്നും കിയാര കുറിക്കുന്നു. ആശുപത്രിയിലെത്തിയപ്പോഴാണ് മകൻ എയർപോഡ് വിഴുങ്ങിയത് അറിഞ്ഞത്. അടിയന്തര ചികിത്സ നൽകി ഡോക്ടർമാർ എയർപോഡ് പുറത്തെടുത്തപ്പോഴാണ് സമാധാനമായത്, കിയാര കുറിച്ചു.  

എന്താനാടാ ഇതൊക്കെ വായിലിട്ടതെന്നാണ് ചോദിക്കാൻ തോന്നിയത്. പക്ഷെ മകനെ സമാധാനപ്പെട‌ുത്തി. കുട്ടികൾക്ക് ഇത്തരം സാധനങ്ങൾ നൽകുമ്പോൾ ശ്രദ്ധിക്കണമെന്ന മുന്നറിയിപ്പും കിയാര പോസ്റ്റിനൊപ്പം ചേർത്തു.