രാജ്യാന്തര തരത്തില്‍ മെഡല്‍ നേടുന്ന ആദ്യ ഇറാനിയന്‍ ബോക്‌സറാണ് സദാഫ് ഖദം. എന്നാല്‍ സദാഫിനെ അഭിനന്ദിക്കുന്നതിന് പകരം താരത്തിനെതിരെ അറസ്റ്റ് വാറണ്ട് പുറപ്പെടുവിച്ചിരിക്കുകയാണ് ഇറാനിയന്‍ ഭരണകൂടം. 

തല മറയ്ക്കാതേയും, ഷോര്‍ട്‌സ് ധരിച്ചും മത്സരത്തിന് ഇറങ്ങിയെന്നതാണ് സദാഫിന് നേരെ ഇറാന്‍ ആരോപിക്കുന്ന കുറ്റം. അറസ്റ്റ് വാറണ്ട് പുറപ്പെടുവിച്ചതോടെ ടൂര്‍ണമെന്റ് നടക്കുന്ന ഫ്രാന്‍സില്‍ തന്നെ തുടരുകയാണ് സദാഫ്. സ്ത്രീകളുടെ വസ്ത്രധാരണം സംബന്ധിച്ച് ഇസ്ലാം നിയമത്തില്‍ പറയുന്ന കാര്യങ്ങള്‍ അനുസരിക്കണം എന്നാണ് ഇറാന്‍ ഭരണകൂടത്തിന്റെ നിലപാട്. 

സദാഫ് രജിസ്റ്റേര്‍ഡ് ബോക്‌സര്‍ അല്ലെന്നാണ് ഇറാനിയന്‍ ഭരണകൂടം ഇപ്പോള്‍ പറയുന്നത്. അതിനാല്‍ സദാഫിന്റെ പ്രവര്‍ത്തികള്‍ വ്യക്തിപരമാണ്. വിവിധ കായിക മത്സരങ്ങളില്‍ പങ്കെടുക്കുവാന്‍ ഇറാന്‍ യുവതികള്‍ മുന്നോട്ടു വരുന്നുണ്ടെങ്കിലും ഡ്രസ് കോഡ് സംബന്ധിച്ച നിബന്ധനകളാണ് അവരെ കുഴയ്ക്കുന്നത്.