ഇസ്ലാമാബാദ്: വധശിക്ഷ നടപ്പിലാക്കുന്നതിന് മുന്‍പ് പാകിസ്ഥാന്‍ മുന്‍ പ്രസിഡന്റ് പര്‍വേസ് മുഷറഫ് മരിച്ചാല്‍ അദ്ദേഹത്തെ തെരുവില്‍ കെട്ടിത്തൂക്കണമെന്ന് പാക് കോടതി. മുഷറഫിന്റെ മൃതദേഹം വലിച്ചിഴച്ച് ഇസ്ലാമാബാദിലെ സെന്‍ട്രല്‍ സ്‌ക്വയറില്‍ കൊണ്ടുവന്ന് മൂന്ന് ദിവസം കെട്ടിത്തൂക്കണം എന്നാണ് പാക് പ്രത്യേക കോടതിയുടെ വിധിയില്‍ പറയുന്നത്. 

മുഷറഫിന് വധശിക്ഷ വിധിച്ച ബെഞ്ചിന്റെ തലവന്‍ പെഷവാര്‍ ഹൈക്കോടതി ചീഫ് ജസ്റ്റിസ് വഖാര്‍ അഹ്മദ് സേത്ത് എഴുതിയ 167 പേജുള്ള വിധിന്യായത്തിലാണ് മൃതദേഹം തെരുവില്‍ കെട്ടിത്തൂക്കണമെന്ന നിര്‍ദേശമുള്ളത്. സുപ്രീംകോടതിയും, പ്രധാനമന്ത്രിയുടേയും പ്രസിഡന്റിന്റേയും ഓഫീസുകളും സ്ഥിതി ചെയ്യുന്ന തെരുവാണ് ഇത്. 

രോഗബാധിതനായ മുഷറഫ് ചികിത്സയിലാണ്. കഴിഞ്ഞ ചൊവ്വാഴ്ചയാണ് 76കാരനായ മുഷറഫിന് മൂന്നംഗ ബെഞ്ച് വധശിക്ഷ വിധിച്ചത്. വിധിയില്‍ ബെഞ്ചിലെ ഒരംഗമായ സിന്ധ് ഹൈക്കോടതി ജസ്റ്റിസ് നസര്‍ അക്ബര്‍ വിയോജിപ്പ് രേഖപ്പെടുത്തി. മുഷറഫിന്റെ മൃതദേഹം വലിച്ചിഴച്ച് തൂക്കണമെന്ന നിര്‍ദേശത്തോടും അദ്ദേഹം വിയോജിച്ചു.