വാഷിങ്ടന്‍: വീട്ടില്‍ സൂക്ഷിച്ച തോക്കില്‍ നിന്ന് അബദ്ധത്തില്‍ വെടിയുതിര്‍ന്ന് മൂന്ന് വയസുകാരന് ദാരുണാന്ത്യം. യുഎസിലെ ഒറിഗോണ്‍ അലോഹയില്‍ വെള്ളിയാഴ്ച രാത്രിയാണ് സംഭവം. ജെയിംസ് കെന്നീത്ത് എന്ന മൂന്ന് വയസുകാരനാണ് മരിച്ചത്.

ലോഡ് ചെയ്ത് വീട്ടിലെ മേശവലിപ്പില്‍ സൂക്ഷിച്ചിരുന്ന തോക്കാണ് ജെയിംസ് കൈക്കലാക്കിയത്. പിന്നാലെ മൂന്ന് വയസുകാരന്‍ തലയ്ക്ക് നേരേ ചൂണ്ടി സ്വയം വെടിയുതിര്‍ക്കുകയായിരുന്നു. ശബ്ദം കേട്ടെത്തിയ വീട്ടുകാര്‍ ഉടന്‍തന്നെ ആംബുലന്‍സ് വിളിച്ച് കുട്ടിയെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.

സംഭവത്തില്‍ ആര്‍ക്കെതിരെയും ഇതുവരെ കേസെടുത്തിട്ടില്ലെന്ന് പൊലീസ് വ്യക്തമാക്കി. തോക്ക് അടക്കമുള്ള ആയുധങ്ങള്‍ അലക്ഷ്യമായി സൂക്ഷിക്കുന്നവര്‍ക്കെതിരേ നടപടിവേണമെന്ന ആവശ്യമുയര്‍ന്നിട്ടുണ്ട്. ഒരിക്കലും ലോഡ് ചെയ്ത നിലയില്‍ തോക്കുകള്‍ വീട്ടില്‍ സൂക്ഷിക്കരുതെന്നും ചിലര്‍ അഭിപ്രായപ്പെട്ടു.